Pengesat e Thaçit për t’u bërë president

Hashim Thaçi është në rrugë të mirë për tu bërë president, kjo për faktin se ai është kandidati i vetëm i shpallur deri me tani. Mirëpo, atij mund t’i dalin disa pengesa.

Kushtëzimi eventual nga partnerët e koalicionit qeverisës, paralajmërimet e opozitës që do ta bllokojë seancën në të cilën do të votohet presidenti i ardhshëm, janë disa nga vështirësitë të cilat mund t’i dalin kreut të PDK-së drejt rrugës për tu bërë president.

Analisti politik, Nexhmedin Spahiu, nuk është i sigurt nëse Thaçi do të arrijë të bëhet president. Spahiu thotë se kushtëzimin më të madh mund t’ia bëjë Lista Serbe dhe deputetët e LDK-së, të cilët më votën dhe pjesëmarrjen e tyre do të përcaktojnë zgjedhjen e presidentit të ardhshëm.

Nga ana tjetër, Albert Krasniqi nga Instituti Demokratik i Kosovës, thotë se deputetët e opozitës mund të pengojnë seancën plenare kur do të zgjidhet presidenti, sepse me numra ata e kanë të pamundur ta bëjnë. Kundërshtimi i opozitarëve më anë të forcës, sipas Krasniqit, do të dëmtonte legjitimitetin e presidentit. /Tribuna Channel/