PDK: Luta i shfrenuar, po bënë spastrim politik

Gjilan – Duke mos guxuar që të bëjë hapin e tij, për riformatizimin e qeverisjes komunale të cilën e ka deklaruar disa herë vetë kryetari i komunës së Gjilanit Lutfi Haziri, si nevojë pas dështimit total në shumicën e drejtorive komunale, ai luftën politike dhe spastrimin e ka drejtuar dhe po vazhdon ta bëjë kundër kuadrove profesionale që i përkasin Partisë Demokratike të Kosovës, të cilët kanë treguar dhe dhënë rezultate të pamohueshme në secilin sektorë të cilën e kanë drejtuar thuhet në reagimin e degës së PDK-së në Gjilan.

Ky spastrim politik po bëhet përmes presioneve dhe një terrori, që i ngjan vetëm kohërave të viteve 1989/90, kur udhëheqësve shqiptar u imponohej që të lëshojnë pozitat udhëheqëse dhe të largoheshin nga vendet e tyre të punës, nga kërcënimet dhe masat e dhunshme që instaloheshin kudo nëpër institucionet dhe ndërmarrjet e ndryshme ekonomike.

Pra, Lutfi Haziri ngjashëm po vepron sikurse 25 vite më parë, ku pas procesit të largimit të kuadrove të PDK-së nga institucionet komunale, tani po vazhdon me presione dhe masa të dhunshme edhe nëpër kompanitë publike, në mënyrë që ta bëjë spastrimin politik. Edhe pse ato nuk janë poste politike, sepse të gjithë janë pranuar me konkurse dhe me kontrata të rregullta të punës.

Fillimisht, ai përmes formës joligjore ka shkarkuar dy Komisionet Komunale të Aksionarëve në dy kompanitë publike, pastaj ka shkarkuar joligjërisht dy bordet e këtyre kompanive dhe tani përmes presioneve po i detyron kuadrot e PDK-së të lëshojnë vendet e tyre të punës, njësojë si dikur në kohën e pushtetit serb.

Akti i dorëheqjes së drejtorit ekzekutiv në kompaninë Eco-Higjiena, ka ardhur si pasojë e presioneve intensive që kanë buruar nga ana e kryetarit të komunës së Gjilanit Lutfi Haziri. Bajram Isufi njihet për suksese, të arritura, transformim dhe menaxhim të mirë të kësaj kompanie, e cila për disa vite radhazi, është vlerësuar si kompania më e mirë regjionale në Kosovë, për menaxhimin e mbeturinave dhe mirëmbajtjen e ambientit.
Por të arriturat dhe zhvillimet pozitive të shqiptarëve i kanë penguar edhe pushtetit në vitet 1989/90, sikurse sot që po i pengojnë Lutfi Hazirit të arriturat dhe sukseset e kuadrove të PDK-së.

Ky kryetar komune po e degradon çdo institucion komunal dhe kompani publike, sepse din vetëm të bëjë largime dhe spastrime politike, por assessi nuk ka dije që të bëjë zgjidhje më të mirë dhe në interes të qytetarëve të Gjilanit.

Edhe pse kanë kaluar 17 muaj të qeverisjes së tij me komunën, ai ende asnjëherë nuk e ka kompletuar qeverisjen me drejtor komunal, e që normalisht do të duhej ta bënte menjëherë me rastin e marrjes së përgjegjësisë si kryetar komune. Po ashtu ai ende nuk ka arritur as të shpall konkurs që nga muaji maj i vitit të kaluar, për të zëvendësuar anëtarët e bordit të kompanisë publike Kosovatrans në Gjilan.

Kjo do të thotë se Lutfi Haziri është i paaftë dhe i paditur për të bërë zgjidhje të problemeve, por është i prirur të luaj fshehtas nëpër errësirë, sepse ditën as këtë nuk është në gjendje ta bëjë.

Ne si PDK nuk do të heshtim përballë këtyre veprimeve të rrezikshme, të papranueshme dhe jo ligjore. Ne nuk do të lejojmë që Lutfi Haziri të krijojë kalifatin e tij në Gjilan. Do të angazhohemi fuqishëm që në Gjilan të kthejmë jetën normale dhe ligjshmërinë e Republikës së Kosovës, nuk do të lejojmë që ligjet e shteteve të tjera të aplikohen në komunën tonë dhe ndaj qytetarëve të Gjilanit përfundon reagimi i Degës së PDK-së në Gjilan./rajonipress/