PDK-ja përgatit elektoratin para ndërrimit të liderit

Kryesia e Partisë Demokratike të Kosovës ka vazhduar edhe të enjten mbajtjen e takimeve të mbyllura, ku është diskutuar për krizën aktuale, si dhe përgatitjet para votimit për president të kreut të kësaj partie, Hashim Thaçi.

PDK-ja ka zhvilluar takime të tilla që nga e marta e kësaj jave, shkruan sot Koha Ditore.

Kreu i PDK-së, njëkohësisht zëvendëskryeministër, ka mohuar të jetë diskutuar për kandidaturën e tij, si dhe mundësinë e kandidimit të Kadri Veselit si kryetar të kësaj partie, pasi ai vetë të japë dorëheqje.

Por burime të gazetës brenda këtyre takimeve i kanë thënë gazetës se takimi po mbahet me qëllim që të sigurohen se nuk do të dështojë votimi i Hashim Thaçit në Kuvend.

Diskutime ka pasur edhe për krizën aktuale dhe hapat që do t’i ndërmarrë partia, pasi Thaçi të largohet pas 16 vjetësh nga posti i të parit të partisë. Edhe pse Kadri Veseli shihet si pasardhësi i vetëm i Thaçit në krye të PDK-së, vetë kreu i saj ka mohuar të jetë diskutuar për këtë çështje.

http://koha.net/?id=27&l=93596