PDK-ja në Viti kundër këshillave komunale të iniciuara nga Nexhmedin Arifi

Gjilan – Të mbahen “zgjedhje” në fshatrat dhe në qytetin e Vitisë në prag të zgjedhjeve komunale dhe në fund të mandatit të kësaj kaste antidemokratike dhe jolegale, përveç tjerash, është edhe e pamoralshme. Është rregull që “zgjedhja” e këshillave – kryetarëve të fshatrave dhe qytetit të bëhet pas zgjedhjeve komunale thuhet në reagimin e degës së PDK në Viti.

Dega e PDK-së në Viti ka reaguar ndaj organizimit të zgjedhjeve të këshillave lokale në fshatrat dhe në qytetin e Vitisë që sipas tyre po mbahen nën drejtimin e Nexhmedin Arifit.

Sipas PDK-së Ligji nuk ka paraparë zgjedhje të kësaj natyre. Sipas ligjeve në fuqi të Republikës së Kosovës njësi themelore e qeverisjes në Republikën e Kosovës është Komuna. Kryetarët e fshatrave dhe kryetari i qytetit mund të emërohen nga Kryetari i Komunës ose të zgjedhën në marrëveshje me subjektet politike të çdo vendbanimi. Këta do të ishin ndihmës për zbatimin e politikave dhe qeverisjes komunale për interesat e qytetarëve. Për këtë do të mjaftonte një akt nënligjor i Komunës (rregullore e Këshillit komunal ose vendim i Kryetarit të Komunës).

Dega e PDK-së në Viti ka sqaruar se me nismën dhe kërkesën e N. Arifit dhe S. Hebibit, është propozuar dhe miratuar një rregullore e kundërligjshme nga Këshilli komunal me të cilën janë “shpallur” zgjedhjet në fshatrat e kësaj Komune dhe në qytetin e Vitisë! Krejt kjo zallamahi është bërë për qëllime politike-partiake! Qëllimi themelor i këtyre antizgjedhjeve është eliminimi i atyre kryetarëve që mund të ishin dashamirë të PDK-së në këtë Komunë. Qëllim i dytë është “shpërlarja” e pak parave që i paska “falur” “LOGOSI” për organizimin dhe mbajtjen e këtyre (anti)zgjedhjeve në vendbanimet e kësaj Komune! A do të lejonte një qeverisje normale që për pak para të falura, të cilat i përfitojnë dy-tre veta, të përçahen qytetarët nëpër lagje e fshatra të kësaj Komune? A do ta bënte këtë punë dikush që do të ishte burrë dhe trim në emër të luftës së ulët kundër PDK-së në Viti? Jo, nuk do ta bënte.

Dega e PDK-së në Viti, në takimin e mbajtur me kryetarët e nëndegëve të saj, është deklaruar kundër këtyre (anti)zgjedhjeve të kundërligjshme dhe të dëmshme për demokracinë, marrëdhëniet dhe mirëkuptimin-tolerancën ndërqytetare e ndërpartiake në Komunën e Vitisë.

Të mbahen “zgjedhje” në fshatrat dhe në qytetin e Vitisë në prag të zgjedhjeve komunale dhe në fund të mandatit të kësaj kaste antidemokratike dhe jolegale, përveç tjerash, është edhe e pamoralshme. Është rregull që “zgjedhja” e këshillave – kryetarëve të fshatrave dhe qytetit të bëhet pas zgjedhjeve komunale.

Dega e PDK-së do të merret me këtë çështje konform ligjeve në fuqi dhe konform interesave të qytetarëve tanë menjëherë pas zgjedhjeve komunale, të cilat do t’i fitojë bindshëm thuhet në njoftimin e zyrës për informim të PDK-së së Vitisë./rajonipress/