PDK: Dyshja LDK-AAK koalicion i dështimeve dhe i mashtrimeve

Gjilan – Vlerësimi i nënkryetarit të komunës nga AAK zotit Rexhep Kadriu se qeverisja LDK-AAK është qeverisje që e shpëtoi Gjilanin nga kaosi, i përngjan më shumë një përralle për parashkollorët, ku fëmijët mashtrohen në ditët e para të shkuarjes në shkollë.Qeverisja në Gjilan është shndërruar në mjet përfitimi për interesa të ngushta personale e klanore dhe të koordinuara brenda koalicionit LDK-AAK thotë Riad Rashiti në emër të këshilltarëve të PDK-së.

Në një sqarim të grupit të këshilltarëve të PDK-së që i dedikohet vlerësimit të Rexhep Kadriut rreth qeverisjes 6 mujore thuhet se nëse parat e qytetarëve të buxhetit të komunës, harxhohen çdo ditë me keqpërdorime të rënda dhe për të cilat këtij koalicioni i duken krejt normale, këto veprime antiligjore janë duke ia humbur rolin dhe kuptimin e qeverisjes komunale si vlerë dhe si mundësi e madhe për të rritur dhe avancuar zhvillimin dhe perspektivën e qytetarëve të Gjilanit dhe Anamoravës. “Realisht koalicioni në Gjilan LDK-AAK, po e dëshmon se është bërë një qeverisje, ku në çdo aspekt po e gënjen për çdo ditë e më shumë qytetarin e saj. Shkrimi i Rexhep Kadriut tregon rolin e tij të PINOKU-t, e në këtë rast edhe kryetarit të komunës nuk po i pengon aventura e tij politike, mirëpo në këtë rast secili paguan për veten e tij” thuhet në reagim, raporton rajonipress.

Analizoni mashtrimet dhe gënjeshtrat në deklaratat e tij, si një nënkryetar i komunës.
“Konstaton se kanë identifikuar shumë probleme në këtë gjashtë mujor të qeverisjes së tyre. Çfarë i thuhet kësaj? E vërtet apo Gënjeshtër? Plotësisht që është e dyta. Pse?
Sepse komuna e Gjilanit i ka të identifikuara të gjitha problemet, qysh në mandatin e parë të formimit të qeverisjes lokale në vitin 2000-2002, hajde po e vlerësojmë se disa janë bërë edhe në mandatin e dytë të saj. Mirëpo për zotëri Rexhep Kadriun edhe mund të jetë e saktë, ngase AAK kurrë nuk ka qenë pjesë e proceseve të mëdha, prandaj tek tani në vitin 2014 ka filluar që të jetë pjesë e qeverisjes lokale. Ndërsa vet Rexhep Kadriu ende është “Brucosh” i politikës lokale, sa për të mos i thënë edhe këtij që është një “Praktikant” i zyrës së kryetarit të komunës së Gjilanit.

Sa i përket shpenzimeve dhe shkeljeve ligjore të cilat ai i thekson se i kanë identifikuar nga qeverisja e kaluar, prapë janë gënjeshtra të kulluara të tij. Sepse të gjitha raportet zyrtare të komunës së Gjilanit për gjashtë mujorin e parë të vitit 2014, konstatojnë se ka rritje enorme të shpenzimeve nga kjo qeverisje aktuale. Në disa tenderë për shërbime ka rritje edhe për 700% në krahasim me vitin e kaluar, e që mu për këtë tender tani dalëngadalë po del në shesh edhe dyshimi që po përflitet në opinion, se edhe vet nënkryetari i komunës mund të ketë gisht aty. Sepse përmes këtyre keqpërdorimeve po mundohet të kompensojë shpenzimet e parafushatës së tij zgjedhore, të cilat vet ai ka deklaruar se ka investuar rreth 200 mijë euro.

Lumi Mirusha e ka vulën e PDK-së dhe guximit të Qemajl Mustafës për ta filluar këtë projekt jashtëzakonisht të rëndësishëm dhe madhor për qytetin e Gjilanit. A thua çfarë mendon Kadriu, pse nuk ka filluar ky projekt deri në vitin 2008? A mendon se nuk ka pasur mjete për ta financuar nga buxheti i Kosovës këtë projekt, e kur atëherë shkonin në suficit të buxhetit mbi 200 milion euro në vit edhe pse zëvendës Kryeministër i Kosovës, ishte kryetari i juaj aktual i komunës së Gjilanit Lutfi Haziri.

Nënkryetari i komunës siç duket ka filluar edhe t`i harrojë gënjeshtrat e tij. Më 5 shkurt 2014, ka deklaruar se nuk do ta lejojmë që projekti i lumit Mirusha të bëhet “Gropa e Hajdin Sejdisë”, ndërsa tani pas 6 muajsh ka dal e vërteta e tij, sepse tani po i thonë “Gropa e Rexhep Kadrisë”, sepse asnjë milimetër nuk është punuar nga aty, ku ai ishte fotografuar gjatë asaj deklarate “Brucoshiane”.

Një gënjeshtër shumë e madhe në deklarimin e tij, është thënë edhe se; “për këta shtatë muaj kemi shtruar gypa të kanalizimit sa për dy vite të qeverisjes së kaluar”. Ndërsa nuk e thotë sa metra gjatësi janë shtruar, sepse pastaj nuk mund të gënjej opinionin.

Apo ndoshta ai nuk e din se projekti i lumit Mirusha i ka dy faza, faza e parë e cila ka përfunduar në vitin 2011, e faza e dytë ende është aty, ku i ka mbetur qeverisjes së kaluar, e ajo është mu në qendër të qytetit.

Ndërsa sa për gypat e kanalizimit, ju i keni shtruar nga 3 metra për një ditë, e që ne, me punë dore i kishim rregulluar këtë punë që ju sot e bëni. Apo ndoshta ju keni humbur shumë kohë, duke u munduar të gjeni mënyrën se si me ia ndërpre kontratën operatorit ekonomik që është duke i kryer punimet.

Nëse ju apo koalicioni LDK-AAK e ka guximin, atëherë mundeni me ia fillu realizimit të projektit të lumit Stanishorka, kuptohet nëse ju e keni “identifikuar” ende. Ose për këtë mos u mundo dhe mos u mërzit aspak, se qytetarët e Gjilanit e kanë identifikuar nga formimi i qytetit të Gjilanit, por ju kuptojmë juve, sepse je rritur diku tjetër.

Për lumin Baja, prapë keni gënjyer fort zoti nënkryetar i komunës. Edhe për këtë ka një vulë të PDK-së, ku e kemi hapur rrugën nga QKMF deri në rrugën e A.Presheva, plotë 400 metra gjatësi, rrugë e cila nuk ka ekzistuar kurrë në Gjilan. Ku edhe për këtë projekt koalicioni i juaj u mundua me ndërpre kontratën me kompaninë më serioze dhe të përgjegjshme “Bardhi”.

Por vetëm pasi Kohavizion bëri lajmin për ndërprerjen e punimeve, ju u detyruat që të ri-filloni kryerjen e këtyre punimeve. Nëse t`i dhe ju e keni guximin, urdhëroni e vazhdoni hapjen e rrugës dhe të projektit prej rrugës A.Presheva deri te Diagnoza, nuk ka shumë, 400 metra gjatësi.

Shërbimet Online – marifet keni treguar me këtë projekt. Ju nuk e dini sigurisht, që PDK në bashkëpunim me donator, i ka hequr tavolinat e punës me dërrasa të mykura dhe ja ka hequr “Gjygymat e qajit” që kanë mbretëruar në Administratën e Përgjithshme. Ku ka krijuar hapësirë të mjaftueshme dhe ambient modern për punë me palë, të cilëve në vazhdimësi i janë ofruar shërbime të reja, të shpejta dhe cilësore.

Rexhep Kadriu, ka harruar edhe gënjeshtrat e tija të tjera, ku kishte deklaruar se më 1 prill do të nisin projekte madhore për Gjilanin. Rrugët me katër korsi, në drejtim të “Drini marketit”, apo ndoshta ai e ka lidhur me “ditën e rrenave”, sepse ka thënë se do të nisin më 1 prill, ndoshta e ka pasur fjalën për zyrtarizimin e gënjeshtrave të tija, apo premtime boshe për “hava”.

Më fal se harruam lagjen “Dardania I”, kujto pak, se ai projekt është plotësisht i qeverisjes së kaluar, me vendim të Kuvendit Komunal dhe mos provo për biznesin tuaj me ndryshu këtë projekt, pa një vendim tjetër të Kuvendit, sepse e rritni fondin e shkeljeve tuaja ligjore.

Sa i përket optimizmit tuaj për krijimin e Qeverisë së Kosovës dhe Ramush Haradinajn kryeministër, (ekziston një thënie e Gollakut e cila na pëlqen shumë), që “Nëse bëjnë, mos ta lanë pa u ba..!

Porosia për nënkryetarin e komunës Rexhep Kadriun është që të mos e luajë edhe më tutje rolin e PINOKIOS, sepse do t`i bëhet hunda shumë e gjatë deri në fund të mandatit thuhet në reagimin e Grupit të Këshilltarëve Komunal të PDK-së./rajonipress/