PDK akuzon për keqëmenaxhim të buxhetit, Surdulli e quan fushatë

Gjilan – Kryesia e degës së PDK-së në Kamenicë ka reaguar ndaj shpenzimeve enorme që kanë bërë zyrtarët komunal të Kamenicës. Ata e kanë përfolur raportin e kryetarit Surdulli të vitit 2012. Shaip Surdulli ndërkaq thotë se këto akuza janë të pa bazuara dhe janë pjesë e fushatës së parakohshme të PDK-së.

Dega e PDK-së në Kamenicë ka reaguar ndaj shpenzimeve të shumta buxhetore që janë kryer nga zyrtarët komunal në këtë komunë. Dega e PDK-së e ka prezantuar raportin e kryetarit Shaip Surdulli të vitit 2012.

Sipas këtij raporti dhe sipas reagimit të PDK-së shihet se ka keqmenaxhim dhe keqpërdorim të buxhetit nga ana e Kryetarit të Komunës së Kamenicës.“Mënyra e keqpërdorimit është shqetësuese për qytetarët e Komunës së Kamenicës dhe shprehur në vlerë reale shpenzimet janë marramendëse” thuhet në këtë reagim.

Në reagimin e PDK-së janë paraqitur shpenzimet për dreka zyrtare që kapin vlerën e 14310 eurove, shpenzimet për karburant për vetura 13780 euro, shpenzime të telefonisë vala 900 , 13320 euro, shpenzimet e udhëtimit 35767 euro etj.

Por ndaj këtyre akuzave ndryshe mendon Shaip Surdulli. I kontaktuar nga rajonipress Surdulli tha se këto akuza janë të pa bazuara dhe janë pjesë e fushatës së parakohshme që po bënë dega e PDK-së. “Unë i lus ata që të përmbahen sepse për tre katër vite janë munduar me njollos punën time , por nuk kanë pasur sukses. Unë në të gjitha këto akuza kam dalur i pastër e do të dali sërish sepse kam punuar me ndërgjegje e përkushtim” tha Surdulli.

Surdulli tha se ky raport së pari ende nuk është zyrtar dhe ende nuk është aprovuar.”PDK-ja duhet të merret me vetveten e jo me punën e mirë që kemi bërë për këto vite “tha Surdulli./rajonipress/