Pasuria e kryeministrit Hashim Thaçi në vitin 2013
RajoniPress
19:53, 3 Qershor, 2013
Agjencia kundër Korrupsionit ka publikuar sot në faqen e saj zyrtare të internetit regjistrat e deklarimit të pasurisë të zyrtareve të lartë publik nga Presidenca, Kuvendi i Kosovës, Qeveria, Agjencia kundër Korrupsionit Gjykatat e Kosovës si dhe Prokurorit, të cilët janë të përfshirë në listën e zyrtarëve të lartë publik në pajtim me Ligjin për Deklarimin, prejardhjen dhe kontrollin e pasurisë, dhe deklarimin, prejardhjen dhe kontrollin e dhuratave.
Në listë gjendet edhe kryeministri Hashim Thaçi, i cili ka ofruar këto të dhëna për pasurinë e tij.
Te pasuria e paluajtshme, kryeministri Thaçi ka deklaruar tokë (për ndërtimin e shtëpisë) në sipërfaqe prej 15.75 ari. Në pyetjen për prejardhjen e pasurisë, ai ka deklaruar se mjetet janë siguruar nga shitja e shtëpisë në lagjen Arbëria të Prishtinës. Shtëpia, sipas tij, është shitur për 260000 euro ndërsa vlera e tokës është deklaruar nga ai 157,000.00, raporton korieri.
Kryeministri Thaçi ka deklaruar edhe ndërtimin e shtëpisë 700.00 m2, për të cilën ka thënë se ka hyrë në kredi 100000 euro në NLB dhe se po investon parat nga shitja e shtëpisë në vlerë 220,000.00.
Numri një i Qeverisë së Kosovës ka deklaruar tokë bujqësore prej 7.00 hektarësh, e cila është thënë se është e përbashkët, ndërsa vlerën ia ka caktuar 180 mijë euro. Thaçi ka deklaruar edhe një shtëpi të përbashkët familjare Shtëpi 250.00 m2, në vlerë 80,000.00.
Në formularin e deklarimit të pasurisë të Agjencisë Anti-Korrupsion, ai ka deklaruar edhe blerjen e një makine VW Passat në vlerë 13,000.00, nga kursimet. Makina është deklaruar në pronësi të bashkëshortes.
Sa i përket parave të gatshme, Thaçi ka deklaruar se ka në në NLB-Prishtina 2,430.00 ndërsa bashkëshortja e tij 5,035.00.
Në rubrikën detyrime financiare ndaj personave juridik dhe fizik, Thaçi ka deklaruar një kredi 100,000.00 në NLB – Prishtina me afat kthimi prej 120 muajsh.
Paga mujore e deklaruar nga Thaçi si Kryeministër është 17,318.00, ndërsa bashkëshortja e tij ka deklaruar si pagë mujore nga Universiteti Fama 18,000.00 euro.
