Pasojat për Kosovën të dialogut pa kushte

E pafuqishme përballë obstruksioneve dhe ndërhyrjeve të Serbisë, Qeveria e Kosovës sërish i është drejtuar Brukselit me një letër ku kërkon marrjen e masave për ndalimin e veprimeve të Beogradit.

Reagimi i ekzekutivit erdhi pas vendimit të kryeministrit të Serbisë, Aleksandër Vuçiq, për t’ua vazhduar jetën strukturave paralele në Komunën e Shtërpcës, duke emëruar kryetar ilegal personin e njëjtë që doli nga zgjedhjet lokale të vitit 2013, shkruan sot Koha Ditore.

Brukseli nuk ka reaguar pas veprimeve të fundit të Serbisë. Ndërkaq analistët thonë se ky është rezultat i asaj se Kosova asnjëherë nuk ka provuar ta kushtëzojë Serbinë.

Në shkresën që ministrja shtetërore për Dialogun, Edita Tahiri, ia ka drejtuar Bashkimit Evropian, përkatësisht Fernando Gjentilinit, është kërkuar që BE-ja të marrë të gjitha masat për të ndalur Serbinë që të ndërhyjë me strukturat paralele në Kosovë.

“Serbia ka vazhduar t’i mbajë strukturat paralele edhe në katër komunat veriore dhe për të cilat Qeveria e Kosovës e ka njoftuar në vazhdimësi Bashkimin Evropian, përfshirë dhe në Raportin për gjendjen në implementimin e Marrëveshjeve të Brukselit të dërguara ën BE në tetor 2014”, ka thënë Tahiri.