Pas votimit të dështuar në Kuvend, Kurti: Do të vazhdojmë si qeveri në detyrë deri në zgjedhje të reja

Mandatari për formimin e Qeverisë së Kosovës, Albin Kurti, ka reaguar pas dështimit për të siguruar shumicën e nevojshme në Kuvend për kabinetin e tij qeveritar.

“Falënderoj të gjithë deputetët që mbështetën propozimin për kabinetin e ri qeveritar dhe qytetarët për përkrahjen. Meqë 56 vota ishin për, 52 kundër dhe 4 abstenime, nuk mund të fillojë ende mandati ynë i ri”, ka deklaruar Kurti.

Ai theksoi se pavarësisht rezultatit, mbetet i përkushtuar për t’u kthyer me energji të re dhe për të përfaqësuar vullnetin e qytetarëve.

“Do të vazhdojmë punën për drejtësi sociale, zhvillim ekonomik dhe shtet të barabartë për të gjithë. Kosova meriton institucione që dalin nga vota e lirë dhe puna e ndershme”, shtoi ai.

Tani i takon presidentes së Kosovës, Vjosa Osmani që të vendosë për hapat e mëtejmë./Telegrafi/