Pas tre muajsh, vendimi për ndryshimin e librave shkollorë

Komisioni për rishikimin e teksteve shkollore, i cili është themeluar qe afro gjashtë muaj, tek në mars të vitit të ardhshëm do të dalë me konstatimet se cilët libra të arsimit të detyrueshëm do të duhen të ndryshohen, shkruan sot Koha Ditore.

Ministri i Arsimit, i Shkencës dhe i Teknologjisë, Arsim Bajrami, ka thënë se Komisioni, i cili udhëhiqet nga zëvendësministrja Anila Statovci, duhet ta dorëzojë raportin e detajuar për ndryshimin e librave shkollorë, më së largu në muajin mars.

“Jam shumë i pakënaqur me përmbajtjet e disa teksteve të lëndëve shoqërore, siç janë ato të gjuhës shqipe, historisë, gjeografisë, edukatës qytetare”, ka thënë ministri Bajrami. Këto tekste, sipas tij, duhet të ndryshohen, meqë “janë të vjetruara, apo kanë përmbajtje ideologjike”.

Ministri Bajrami i ka marrë si shembull tekstet e lëndës së historisë.

“Ajo duhet të mësohet në mënyrë reale e pa ndikime politike, dhe unë kam marrë vendim që këto tekste të rishkruhen nga autorë neutralë që e shohin historinë nga këndi profesional dhe shkencor”, ka deklaruar ai.

http://koha.net/?id=27&l=91082