Pas 5 vjetësh Specialja sinjalizon aktakuzat e para, priten arrestime

Dhomat e Specializuara të Gjykatës Speciale të martën kanë vazhduar me dërgimin e ftesave për ish-pjesëtarët e UÇK-së, derisa nga Prokuroria Speciale tashmë kanë njoftuar se së shpejti do të nisë edhe ngritja e aktakuzave. Njohësit e sistemit të drejtësisë thonë se pas konfirmimit të aktakuzave mund të priten edhe arrestimet e para, shkruan sot Zëri.

Ndonëse janë bërë pesë vjet nga themelimi i Dhomave të Specializuara të Gjykatës Speciale, ky organ tek tani ka dhënë sinjale se së shpejti mund të ngrihen aktakuzat e para. Kjo pasi të hënën Prokurori i Specializuar ka njoftuar kryetaren e Dhomave të Specializuara të Kosovës, Ekaterina Trendafilova, se po bëhet gati t’i fillojë procedimet penale para Dhomave të Specializuara, si dhe ka bërë kërkesë për caktimin e një gjykatësi të procedurës paraprake për t’i shqyrtuar aktakuzat sipas ligjeve në fuqi.