Pas 28 vjet qëndrimi në Zvicër, dëbohet në Kosovë babai i 5 fëmijëve

Kosovari 53 vjeçar ka qenë i dënuar me 8.5 vjet burg për tregti me drogë. Gjykata Federale e Zvicrës e ka vërtetuar vendimin për dëbim që e ka marrë më parë Zyra për Migracion e Bazelit.

Nga 53 vjet të jetës së tij, kosovari, baba i pesë fëmijëve, më shumë se gjysmën i ka kaluar në Zvicër. Nga viti 1989 ai jeton në Zvicër ndërsa në vitin 1996 ka marrë vizën dhe e ka sjellë këtu gruan me katër fëmijët. Në Zvicër ndërkaq i ka lindur edhe fëmija i pestë. Por ai është dënuar për tregti me drogë dhe për pasojë duhet të lëshojë Zvicrën, shkruan aargauerzeitung.ch.

Gjykata Federale e Zvicrës e ka vërtetuar vendimin për dëbim të kosovarit që e ka marrë më parë Zyra për Migracion e Bazelit. Sipas saj, ndarja e tij nga familja është e pranueshme, edhe për faktin se ai e ka vënë në lojë fatin e familjes duke u marrë me tregtinë me drogë.

Familja e tij e kishte marrë lejen e qëndrimit të përhershëm (C) në vitin 2010. Pak pas kësaj, kryefamiljari dënohet me tetë vjet e gjysmë për delikte droge, pastrim parash dhe detyrim, transmeton albinfo.ch. Duke u mbështetur mbi këtë dënim Zyra për Migracion e Bazelit ka vendosur ndaj tij masën e dëbimit nga Zvicra.

Duke kundërshtuar pretendimin e kosovarit se me dëbimin e tij po ndahej familja, dhe se e kishte një fëmijë edne të moshës së mitur, Gjykata Federale ka theksuar se interesi publik i Zvicrës për largimin e kosovarit peshon më shumë se interesi privat i tij. Kjo për faktin se veprat e tij penale janë të një peshe të rëndë. Gjatë katër viteve ai ka bërë shitjen e tetë kilogramëve të heroinës dhe të sasive më të vogla të kokainës.

Ai ka neglizhuar dy vërejtje që i janë bërë më parë se mund të dëbohej dhe ka vazhduar të jetë aktiv në tregtinë me drogë, përcjell albinfo.ch gazetën zvicerane. Në këtë mënyrë kosovari, sipas gjykatës, ka qenë vetë ai që nuk e ka vlerësuar familjen e tij.

http://www.albinfo.ch/pas-28-vjet-qendrimi-ne-zvicer-debohet-ne-kosove-babai-i-5-femijeve/