Partneritetet Publike – Private, një drejtim i domosdoshëm për zhvillimin e Gjilanit

Gjilan – Si kandidate për Kuvendin Komunal të Gjilanit, besoj fuqishëm se transparenca dhe partneritetet publike-private janë dy shtyllat mbi të cilat duhet të ndërtohet e ardhmja e komunës sonë ka shkruar Mrika Krasniqi Shala.

Postimi i plotë:

Transparenca është themeli i besimit mes qytetarëve dhe institucioneve. Çdo vendim, kontratë apo projekt që realizohet nga Komuna, duhet të jetë i hapur dhe i qasshëm për publikun.

Vetëm kështu qytetarët do të ndihen pjesë e procesit dhe do të kenë besim se vendimmarrja bëhet në interes të tyre.

Nga ana tjetër, partneritetet publike-private janë mundësia më e mirë për të sjellë zhvillim të qëndrueshëm ekonomik. Duke përfshirë bizneset lokale në projekte infrastrukturore, kulturore, sportive dhe sociale, jo vetëm që sigurojmë investime të reja, por edhe krijojmë vende pune dhe rrisim cilësinë e shërbimeve për qytetarët.

Unë do të angazhohem që çdo partneritet të jetë i ndershëm, transparent dhe mbi të gjitha në interes të qytetarëve të Gjilanit.

Vetëm kështu mund ta zhvillojmë komunën tonë në një model të mirëqeverisjes dhe bashkëpunimit të ndershëm./rajonipress/