Partnerët e koalicionit duan ndryshime në Qeveri

Ministri i rikthyer në postin e shefit të diplomacisë kosovare, Enver Hoxhaj, paralajmëroi zvogëlim dhe ndryshime në qeverinë e Kosovës. Hoxhaj ka thënë se vendimi për këtë u takon kryetarit të PDK-së, Kadri Veseli dhe atij të LDK-së, Isa Mustafa.

LDK ditë më parë ka mbajtur një mbledhje të Kryesisë, ku temë e diskutimit ka qenë riformatimi i Qeverisë.

Arban Abrashi pati deklaruar se kjo çështje do të jetë temë për javët e ardhshme pasi është edhe kërkesë e faktorit ndërkombëtarë.

“Nuk do të kisha përmend detaje por kjo është edhe kërkesë që ka ardhur nga jashtë. Janë disa ministri që ndoshta duhet të shkurtohen ose të bëhen pak disa prej tyre. Është çështje e javëve në vijim që do ta konsultojmë edhe me partnerët e koalicionit”, ka deklaruar Abrashi.

Ndërkaq zëdhënësi i PDK-së Blerand Stavileci deklaroi për Klan Kosovën se riformatimi i Qeverisë është i nevojshëm por se Kosova ka tema të tjera politike që kërkojnë trajtim të menjëhershëm.

“Mendoj që ka hapësirë për një gjë të tillë në mënyrë që të jetë një koordinim shumë më i efektshëm në mes të ministrive, sidomos atyre që lidhen me fusha të caktuara”.

“Mendoj që janë disa tema politike të cilat kërkojnë trajtim të menjëhershëm pa e nënvlerësuar edhe këtë temë por mendoj që ka kohë”, tha Stavileci.