UBT

Partitë në Kosovë të paprofilizuara politikisht dhe ideologjikisht

/ 3 minuta lexim

Partitë politike në Kosovë mbeten ende në procesin e profilizimit dhe demokratizimit të tyre.

Reformat dhe demokratizimi i brendshëm, potencohen sa herë që partitë politike hyjnë në proceset e brendshme zgjedhore, çka sipas analistëve politikë dëshmon se ato janë me vjet të tëra në këtë proces. Si të tilla, partitë e spektrit politik në Kosovë konsiderohen se janë kryesisht lideriste.

Sipas analistëve, ndonëse një pjesë e partive politike janë formuar qysh në kohën e pluralizmit në ish-Jugosllavi dhe kanë vazhduar punën edhe pas luftës së fundit apo edhe partitë e formuara pas vitit 1999, që të gjitha kanë mbetur të paprofilizuara politikisht dhe ideologjikisht.

Ata nënvizojnë se ende nuk mund të thuhet me saktësi se cilat parti politike i takojnë qendrës, e cilat krahut të partive të djathta apo të majta.

Politologu Ramush Tahiri, tha për Radion Evropa e Lirë, së partitë politike në Kosovë edhe më tutje nuk janë të reformuara dhe se shumica janë parti lideriste.

“Nuk kemi reformë te asnjë parti. Nuk dëshirojnë të jenë demokratike. Të gjitha partitë duan të jenë lideriste dhe të udhëheqin në vijë vertikale. Dhe kemi afera të ndryshme të përçarjeve në nivelin lokal të partitë politike në nivelin lokal, po edhe të nivelit lokal me nivelin qendrorë. Faktikisht zgjedhje të mirëfillta për lider në parti politike dhe për kuadro nuk kemi”, tha Tahiri

Sipas tij, nga ajo që vërehet deri tani është se ka një diktat që udhëhiqet nga qendra në pothuajse secilin subjekt politik në Kosovë.

“Kemi pak a shumë një diktat i cili udhëhiqet nga qendra edhe nga oligarkikë që i udhëheqin partitë që është një gërshetim i fuqisë së pushtetit me fuqinë lokale”, tha Tahiri.

Uji Dea

Ndërkaq, analisti politik, Artan Muhaxhiri thotë se në asnjë parti politike në Kosovë nuk funksionojnë parimet demokratike.

“Partitë politike kosovare janë parti lideriste dhe rreth liderit krijohet një klan i njerëzve të fuqishëm të cilët i orientojnë partitë respektive. Ndërsa të gjitha ndryshimet kozmetike të cilat bëhen e kanë për synim të vetëm mos-ndryshimin e mënyrës së funksionimit aktual të partive politike”, tha Muhaxhiri.

Ai thotë se në bazë të funksionimit, partitë politike marrin vota jo përmes parimeve e programeve e ideologjisë, por përmes klientelizmit dhe punësimeve jo meritore që u bëjnë personave të caktuar.

“Pra, është një klientelizëm total i cili nuk ka asgjë të bëjë me politiken normale e cila bazohet në ide, në ideologji dhe programe”, tha Muhaxhiri.

Njohësit e zhvillimeve politike theksojnë se si rezultat i mungesës së profilizimit të partive politike, në Kosovë konsiderohet e moralshme që disa individë të lëvizin nga një parti në tjetrën, për të fituar një mandat për veprim politik.

Kjo, sipas tyre, ka ndodhur në shumicën e partive të mëdha politike pa përjashtim.

Në Kuvendin e Kosovës, në legjislaturën e gjashtë, janë të përfaqësuar gjashtë parti politike shqiptare, dy serbe, kurse të tjerat u përkasin komuniteteve,boshnjake, turke, rome, egjiptiane dhe e komunitetit ashkali.