“Parku i paqes” shkakton dhunë

Motoja “Ose ju ose na” ra të dielën pasdite. Qindra protestues shqiptarë me këtë moto marshuan drejt urës së Ibrit, ku ditë më parë midis urës që ndan qytetin e minatorëve, vendosën një të ashtuquajtur “Park i Paqes”. Por ata nuk u lejuan t’i afrohen parkut fare, pasi u zmbrapsën nga policia me dhunë. Kështu që motoja e protestuesve shqiptarë ra pasi që nuk arritën të afrohen te ura e lirë që po e kërkojnë.

Rreth orës 15 protestuesit u nisën për të marshuar drejt vendit ku janë mbjellë pisha, lule dhe po ndërtohet një mur betoni. Por u penguan nga Policia e Kosovës, KFOR-i dhe EULEX-i që ishin përqendruar mbi urën e lumit Ibër. Koncentrimi i gjithë këtyre forcave të Policisë ka filluar disa orë më parë. E protestuesit të nervozuar kanë tentuar ta thyejnë kordonin që policia kishte vendosur për t’i penguar ata.

Ata filluan të gjuajnë me gurë mbi policinë e këta të fundit i janë përgjigjur me gaz lotsjellës. Protestuesit u kanë vënë flakën dy veturave të policisë, ndërsa një e ndërkombëtarëve është rrokullisur. Raportohet edhe për policë të lënduar gjatë kësaj proteste.

Avni Zahiti zëdhënës i Policisë për Mitrovicë, ka thënë se janë më shumë se shtatë policë të lënduar, ndërkaq raportohet edhe për disa qytetarë që kanë marrë lëndime…(Tribuna).