Paralajmëron Ministrja e Financave, thotë se mund të ketë ulje të pagave në sektorin publik

Ministrja e Financave, Hykmete Bajrami, ka thënë se mund të ketë ulje të pagave në sektorin publik nëse do të ketë krizë të thellë në vend.

Sipas Bajramit, nëse një krizë e tillë e godet Kosovën, secili shpenzim do të rishikohet.

“…normalisht që një gjë e tillë nuk përjashtohet asnjëherë. Si Qeveri e Kosovës nëse s’ka të hyra në buxhet natyrisht që të gjitha shpenzimet do të detyrohemi t’i rishikojmë. Por më lejoni të them, që për herë të parë, Qeveria Hoti, nga qeveria drejtpërdrejtë po u zgjatet dora ndërmarrjeve private nga fondi prej 365 milionë eurosh. 122 milionë kanë shkuar te qytetarët. Deri tash kemi 300 milionë euro më pak të hyra. Por përkundër kësaj, për t’iu gjendur sektorit privat, shteti po shfrytëzon kreditë që t’u ndihmojë qytetarëve dhe sektorit privat”, ka thënë Bajrami.

Por, Bajrami ka thënë se aktualisht çështja e pagave në sektorin publik s’po diskutohet, derisa ka shtuar se “s’ka asnjë shpenzim të paprekshëm”.