Paralajmërimi i Zelenskyt për destabilizim, Haradinaj: Zgjidhja për Kosovën, anëtarësimi në NATO
RajoniPress
18:32, 18 Nëntor, 2023
| 5 muaj më parë
Kryetari i Aleancës për Ardhmërinë e Kosovës, Ramush Haradinaj, duke folur për situatën e sigurisë në vend, ka thënë se anëtarësimi në NATO është zgjidhja.
Ish-kryeministri kosovar ka deklaruar se misioni paqeruajtës i NATO-s në Kosovë, KFOR, duhet ta angazhojë Forcën e Sigurisë së Kosovës në patrullime të përbashkëta dhe të bashkëpunojë me Policinë e Kosovës dhe EULEX-in.
Sipas tij, të gjitha institucionet e sigurisë duhet të bashkohen për të mos lejuar që situata të dalë jashtë kontrolli.
“Ftesa për Kosovën në NATO, anëtarësimi i menjëhershëm dhe i plotë është zgjidhja. KFOR ta angazhojë FSK-në në patrullime të përbashkëta dhe të bashkëpunojnë ngushtë me Policinë e Kosovës dhe Eulex-in. Të gjitha institucionet e sigurisë të bashkohen për të mos lejuar që situata të dalë jashtë kontrolli, si në aspektin politik, të sigurisë dhe në ekonomi”.
“Kosova në NATO, është zgjidhja tani! Agresioni rus ndaj Ukrainës e konfirmon këtë”, ka shkruar Haradinaj në Facebook.
Çështja e sigurisë në Kosovë u ngrit sërish para dy ditësh kur presidenti i Ukrainës, Volodymyr Zelensky, alarmoi duke thënë se ka informata që Rusia po synon të nisë luftë të re në Ballkan për ta larguar vëmendjen nga pushtimi i Ukrainës.
“Sot të gjithë po diskutojnë për krizën në Lindjen e Mesme. Por siç kam thënë, nuk është problem i djeshëm, por as nga pardje. Të gjithë e dinë këtë konflikt të vazhdueshëm, por askush nuk dëshiron t’i japë fund. Konflikti në Lindjen e Mesme, prapa saj qëndron Rusia, jemi të sigurt se këtë po e bën me aleatin e saj – Iranin”, tha Zelensky para gazetarëve afrikanë, transmeton Telegrafi.
“Kushtoni vëmendje Ballkanit. Më besoni, kemi informacione: Rusia ka një plan të gjatë. Lindja e Mesme do të jetë Ballkani, e nëse vendet e botës nuk ndërmarrin diçka, do të ketë një shpërthim të tillë. Kjo është arsyeja pse Rusia do të sigurohet se një vend i Ballkanit (të jetë) në luftë me një tjetër”, tha Zelensky.
Sipas tij, Rusia është sërish e interesuar në ridrejtimin e ndihmës.
“Tani ata kanë filluar të minojnë situatën në Moldavi. Për të treguar se diçka nuk shkon atje gjatë zgjedhjeve, për t’i shpallur zgjedhjet jokushtetuese. Për të rrëzuar sërish qeverinë aktuale. Për të rrëzuar qeverinë pro-evropiane”, tha Zelensky. /Telegrafi/
