Parada e priftërinjve

Radikalizimi i rrymave fetare, në Komunë të Bujanocit, ka marrë përmasa shqetësuese. Para disa ditëve nga disa persona partiak (PVD) dhe fetarë (hoxhallarë), lindi ideja të organizohet një Iftar i madh në qendër të qytetit të Bujanocit, i cili do të grumbulloj rreth vetes jo më pak se 500 besimtarë.

Një iniciativë e tillë, nuk kaloi pa jehonë. Në mesin e qarqeve të ndryshme politike dhe shoqërore, pati komente “për” dhe “kundër” një iftari të tillë, i cili më shumë i sillte telashe komunës shumetnike të Bujanocit se sa një ngjarje të shënuar kulturor e fetare.
Dy ditë më vonë serbët lokalë të Bujanocit, si kundërpërgjigje organizuan nga qendra e qytetit e deri në periferi të tij një marsh fetar. Në atë marsh me flamuj shtetëror e fetar, kishte edhe flamuj dhe veshje fetare ruse.

Në ballë të kolonës fetare prinin përfaqësuesit e pushtetit lokal dhe të subjekteve politike, të cilat shkëlqenin me një radikalizëm primitiv dhe reflektonin një revanshizëm ekstrem.
Marshi fetar përcillej nën masat e rrepta të policisë dhe këndoheshin këngë të ritit fetar me elemente të radikalizmit serb.

Një marsh i tillë u mbajt për herë të parë në Komunën e Bujanocit, duke i dhënë një leksion të mirë shqiptarëve, të cilët shpesh bëjnë hop pa e kërcyer gardhin. Nuk thuhet kot: “Qeni i keq ta bjen ujkun në torishtë!”./jehonapress/