“Paqe” mes PDK-së dhe Krasniqit

Partia Demokratike e Kosovës që udhëhiqet nga kryeministri Hashim Thaçi, po tregohet tolerante në raport me kryeparlamentarin Jakup Krasniqi. Me gjithë faktin se Krasniqi tanimë e ka formuar subjekt të ri politik, kjo parti nuk e ka ndërmend ta heqë nga karrigia e të parit të Kuvendit. Përkundrazi, PDK-ja ka vendosur që ta pranojë kryetarin e Këshillit Drejtues të NISMËS si partner shtesë të koalicionit aktual në institucione.

Por, kryeparlamentari Krasniqi, qëndrimin e tij në pozitën që i takon PDK-së po e justifikon me ruajtjen e institucioneve nga kriza e mundshme. Krasniqi ka thënë të hënën se nuk dëshiron që t’i krijojë vendit krizë institucionale, prandaj edhe do të presë kërkesën e PDK-së që, sipas tij, edhe i takon posti i kryetarit të Kuvendit.

“Kryesia e Nismës ka bërë të ditur se kryetari i Kuvendit e ka gatishmërinë për t’u dorëhequr pasi partia më e madhe, sipas Kushtetutës, e ka të drejtën ta ketë pozitën e kryetarit të Kuvendit. Ta bëjnë kërkesën e pastaj jam i gatshëm të dorëhiqem. Nuk dorëhiqem pa e bërë kërkesën PDK për faktin se nuk dëshirojmë të krijojmë krizë institucionale në Republikën e Kosovës”, ka thënë Krasniqi…(Tribuna).