Pakurrizorët e politikës!

Nga Arbana Xharra – Arrogantët e politikës, të cilët as që kanë dashur t’ia dinë për skamjen, për gjendjen e mjerueshme të mijëra familjeve në Kosovë, për fëmijët që punojnë si hamall, pleqtë pensionistë që mezi mbijetojnë, e të tjerët që nuk janë asnjëherë në agjendën e tyre në një ditë të zakonshme, si duket kanë pësuar metamorfozë.

Nga zori i votës tash kanë kapur lopatat, kanë përvjelë mëngët – ndonëse xhipat e parkuar pak metra tutje- bëjnë sikur po solidarizohen me gjendjen e rëndë të përditshme që kanë bashkëqytetarët e tyre.

Deri pak ditë më parë, ata me luksin e ndërtuar që ua mundësoi fuqia e pushtetit kanë bredhur përpara hundeve të po këtyre qytetarëve duke mos e vërejtur as ekzistencën e tyre. Kanë besuar se janë të paprekshëm, duke reflektuar me bindje se mund të arrijnë gjithçka.

Është kjo kategori më e rëndë e shoqërisë sonë që përbëjnë shumicën e votuesve potencialë e cila po manipulohet rëndë në fushatën parazgjedhore. Kjo shtresë është bërë cak i politikanëve, të cilët ua kanë zënë derën duke i gënjyer e mashtruar pa fije turpi. Barkthatët nuk e kanë komoditetin të zgjedhin, mjaftojnë t’u premtosh një shujtë e pak ujë…

Janë këta qytetarë e familjarë të atyre që po e lëshojnë vendin; ngase s’kanë se ku ta gjejnë një vend pune të kapluar nga zori i mbijetesës.

Të dhënat e fundit zyrtare të Eurostat, kanë treguar se nga vitit 2009, (një vit pas shpalljes së pavarësisë së Kosovës) deri në gusht të vitit 2013- mbi 66 mijë kosovarë kanë marr rrugën e azilit.

Kjo shifër tregon qartë se në çfarë derexhe është qytetari i Kosovës prej të verbuarve nga ambiciet e fuqisë dhe parasë që i kanë arritur brenda natës të cilët nuk kanë dashur të dinë për gjendjen me të cilën po ballafaqohen qytetarët e këtij vendi.

E sot po këta politikanë që kanë shfrytëzuar çdo mundësi manipulimi me paranë publike po trokasin derë më derë për ta kërkuar votën.

Premtojnë milionat sikur po i marrin nga “bahçja e babës”. Më shumë se 500 milionë euro investime për 3-4 komuna, ka premtuar deri me tash kreu i PDK-së, Hashim Thaçi, e kush e di sa edhe sa qindra miliona do ti “shkep” rreth e rrotull Kosovës deri në fund të fushatës.

Derisa i gjithë buxheti i Kosovës është 1.5 miliard euro kurse të hyrat komunale totale; grantet qeveritare dhe të hyrat vetanake për vitin 2014 janë paraparë të jenë gjithsej 382 milionë e 623 mijë euro.

Qytetarët e hipnotizuar nga përrallat e politikës që brohorasin nëpër tubime, nuk pyesin se për 14 vjet pas luftës ; Sa zyrtarë u dënuan për keqpërdorim të pozitës, sa prej tyre u denoncuan për haraç, kush nga ata dha llogari për pasurinë që e ka krijuar me rrogë…

Janë po këta politikanë që kontribuuan në rrënimin e themeleve të demokracisë me ndihmën e servilëve që edhe sot i përcjellin të jargavitur nëpër fushatë.

Këta njerëz të politikës nuk dinë ku është kufiri, të zhveshur nga çdo ndjenjë njerëzore, nuk kanë kursyer as fëmijët e sëmurë për fushatë.

Deri dje nuk e kanë ditur as adresën e fëmijëve me autizëm dhe sindrom down, sot bëjnë sikur kanë mëshirë për ta. Këto veprime të tyre kalojnë çdo normë të moralit politik!