Pajaziti: PDK ka kreativitet dhe energji të bollshme për të qeverisur ende

Gjilan – PDK nuk është lodhur nga organizimi politik dhe institucional, PDK po tregon se ka energji akoma më shumë për punë politike e institucionale duke e ruajtur freskinë dhe potencialin në qeverisje ka thënë kryetari i degës së PDK-së në Gjilan Zenun Pajaziti , në takimet ku po bashkëbisedon me strukturat e nëndegëve dhe me qytetarët e Komunës së Gjilanit.

“Madhështia e PDK-së nuk është vetëm për faktin se jemi parti e madhe, nuk është vetëm për faktin e vlerave të lidershipit të saj , por është për shkakun se në strukturat dhe aktivitetin e saj politik janë njerëzit më të mirë, më të devotshëm, më të palodhshëm dhe më të përkushtuar për qytetin dhe shtetin e tyre”. Kështu është shprehur Zenun Pajaziti kryetar i PDK-së në Gjilan gjatë bashkëbisedimeve që po bënë me nëndegët e PDK-së në teren.

Pajaziti ka thënë se gjatë qeverisjes së PDK-së në Gjilan, Kryetari i Komunës Qemajl Mustafa dhe të gjithë përgjegjësit e sektorëve qeverisës, me përkushtimin dhe përgjegjësinë institucionale kanë punuar maksimalisht për të realizuar projekte të fushave të ndryshme në tërë komunën, duke trajtuar në mënyrën më të mirë kërkesat e shumta të qytetarëve të komunës pa asnjë dallim.

“Duke krahasuar angazhimin tonë institucional me mosangazhimin e të tjerëve, duke krahasuar suksesin tonë me mossuksesin e atyre që ishin në qeverisje para nesh, PDK do ta marr edhe kësaj radhe besimin e qytetarëve për të qeverisur me Gjilanin e Kosovën për arsyen se edhe sot PDK ka shumë ide e projekte, PDK ka sistem të punës e të qeverisjes, PDK ka kreativitet e energji për të vazhduar punët e mira në qeverisje” mendon Pajaziti.

Ndërsa duke iu referuar kritikave të fundit që po bëhen në adresë të PDK-së, Pajaziti ka deklaruar se “PDK është e vendosur në jetësimin e plotë të shtetësisë në gjithë territorin e saj. Fatin e vendit tonë ne nuk e vëmë në pazar, por fatin e vendit tonë do ta caktojmë e prosperojmë së bashkë me miqtë tanë” .

Ndërkaq në anën tjetër nikoqirët e nëndegës së XXV-të të PDK-së (Lagja e VIII-të) Mevludin Zeqiri, kryetar i nëndegës dhe Sahit Abazi anëtarë i kryesisë së Degës vunë në spikamë të arriturat dhe investimet e mëdha dhe kualitative të cilat janë rezultat i përkushtimit të madh të qeverisjes së PDK-së, e që deri atëherë ky lokalitet ishte i harruar nga ata që njëherë kishin pushtetin e që tash pa mbulesë e pa të drejtë po e kërkojnë sërish.

Jo vetëm liderët e kësaj nëndege po edhe qytetarët e shumtë të pranishëm ishin falënderues dhe shprehën mirënjohje për qeverisjen e mirë nga PDK, duke u shprehur të gatshëm që këtë besim për PDK-në ta rikonfirmojnë edhe në zgjedhjet e sivjetme thuhet në njoftimin e Arzie Nuhiut zëdhënëse e degës së PDK-së në Gjilan./rajonipress/