Paga minimale në Kosovë, 130 deri në 170 euro

Paga minimale në Kosovë do të sillet nga 130 deri në 170 euro, e jo 65% e pagës mesatare të kërkuar nga Këshilli Ekonomik Social. Këtë vendim e ka marrë Ministria e Punës dhe e Mirëqenies Sociale.

Kjo ministri është duke e përkrahur idenë që pushimi i lehonisë të jetë 9 muaj, 3 muaj të paguhet nga qeveria, 3 nga punëdhënësi dhe 3 muaj të tjerë të mbeten pa pagesë. Këto hapa nuk i ka mirëpritur kryesuesi i Këshillit Ekonomik Social, Alush Sejdiu.

Ministria e Punës dhe e Mirëqenies Sociale nuk ka pranuar propozimet e Këshillit Ekonomik Social për kohën e lehonisë dhe pagën minimale, transmeton KTV.
Ministri i Punës, Nenad Rashiq, ka thënë se për paga minimale është vendosur të jetë 130 dhe 170 euro dhe kjo duke u bazuar në situatën ekonomike.

Sa i përket kohës së lehonisë, Rashiq ka thënë se ministria që ai e drejton përkrah pushimin e lehonisë, e cila do të paguhej 3 muaj nga shteti, 3 nga punëdhënësi dhe paga do të ishte 220 euro, jo 140 sa është tani.

Ai ka bërë të ditur se me këto ndryshime, brenda tre vjetësh do të jenë të prekshme, pasi që atëherë do të shihet më saktë sesa është rritja e numrit të femrave të punësuara.

Mirëpo, me këto vendime dhe propozime nuk është pajtuar kryetari i Këshillit Ekonomik Social.

Ky organ këshillëdhënës në mbledhjen e fundit i kishte propozuar qeverisë që paga minimale të jetë 65% e pagës mesatare, kurse pushimi i lehonisë të jetë 9 muaj dhe ai të paguhet gjysmë nga qeveria dhe gjysma tjetër nga punëdhënësi./Indeksonline/