Pacolli shpërthen për Aeroportin e Vlorës: “Na mbyllën dyert e investimit 310 milionë eurosh – kjo është goditje ndaj Shqipërisë, ligjit dhe çdo investitori serioz”

Vlorë – Biznesmeni i njohur shqiptar Behgjet Pacolli ka reaguar ashpër lidhur me situatën e krijuar në Aeroportin e Vlorës, duke e cilësuar atë si një nga rastet më shqetësuese për sigurinë juridike, klimën e investimeve dhe respektimin e vendimeve gjyqësore në Shqipëri.

Në një deklaratë të gjatë publike, Pacolli ka ngritur alarmin për atë që ai e quan bllokim të padrejtë të një prej investimeve më të mëdha strategjike në vend, duke theksuar se kompania e tij është privuar nga qasja në aeroportin që, sipas tij, është ndërtuar me përkushtim, profesionalizëm dhe me mbi 310 milionë euro investime.

Sipas Pacollit, më 18 maj janë mbyllur dyert e aeroportit për investitorin dhe nënkontraktorët e tij, pikërisht në fazën përfundimtare të punimeve, kur terminali, infrastruktura, sistemet teknike dhe përgatitjet për operim ishin pothuajse të kompletuara.

“Ne donim vetëm ta përfundonim dhe ta vinim në funksion aeroportin. Gjithçka ishte gati. Kishim ndërtuar një projekt modern që do t’i shërbente Shqipërisë dhe shqiptarëve për dekada. Sot gjendemi jashtë aeroportit që e kemi ndërtuar vetë”, ka shkruar Pacolli.

Ai ka rikujtuar se kompania e tij ka fituar edhe në instancat më të larta gjyqësore, duke përfshirë Gjykatën e Lartë, por pavarësisht kësaj, sipas tij, vendimet e drejtësisë nuk po zbatohen në praktikë.

Në reagimin e tij, Pacolli shpreh shqetësim të thellë për informacionet që, sipas tij, flasin për hyrje të personave të paautorizuar në objektet e aeroportit, dëmtime të inventarit, largim materialesh dhe tentativa për përvetësim të aseteve pa praninë dhe autorizimin e investitorit.

“Kur shoh dëshmi se persona të paautorizuar hyjnë dhe dalin nga terminali që kemi ndërtuar me mund e sakrificë, më dhemb shpirti. Çdo hapësirë e atij terminali mban gjurmët e qindra punëtorëve dhe të një investimi të bërë me besim tek e ardhmja e Shqipërisë”, ka theksuar ai.

Pacolli e konsideron këtë situatë shumë më tepër sesa një mosmarrëveshje biznesi, duke argumentuar se rasti prek drejtpërdrejt themelet e shtetit ligjor dhe besimin që investitorët vendas e të huaj duhet të kenë tek institucionet.

Sipas tij, nëse një investim strategjik me përmasa të tilla mund të bllokohet pavarësisht vendimeve të formës së prerë gjyqësore, atëherë vihet në pikëpyetje siguria juridike e çdo investimi në vend.

Në deklaratën e tij, ai ka shprehur zhgënjim edhe për mungesën e reagimit institucional ndaj kallëzimeve dhe provave të paraqitura ndër vite, duke bërë thirrje që organet kompetente të hetojnë me seriozitet të gjitha rrethanat që kanë çuar në këtë situatë.

Pacolli ka theksuar se kërkesa e tij nuk lidhet me hakmarrjen apo konfliktin, por me nevojën për transparencë, drejtësi dhe mbrojtje të ligjit.

“Aeroporti i Vlorës është ndërtuar me dashuri për Shqipërinë dhe me bindjen se do t’u shërbejë qytetarëve shqiptarë. Kërkoj vetëm drejtësi, transparencë dhe mbrojtje ligjore. Institucionet duhet të reagojnë jo për mua, por për Shqipërinë, për rendin juridik dhe për besimin që qytetarët e investitorët duhet të kenë tek shteti”, ka deklaruar ai.

Reagimi i Pacollit pritet të nxisë debat të gjerë publik, pasi prek një projekt strategjik me rëndësi të veçantë për zhvillimin ekonomik, turistik dhe transportues të Shqipërisë. Për shumë njohës të ekonomisë dhe investimeve, çështja e Aeroportit të Vlorës tashmë tejkalon interesin e një kompanie të vetme dhe shndërrohet në një test serioz për funksionimin e shtetit ligjor, mbrojtjen e pronës dhe garantimin e sigurisë për investimet e mëdha në vend./rajonipress/