Pacolli: Qeveria t’i tregojë popullit se ku janë mjetet e Trustit dhe Privatizimit

Presidenti i AKR’së Behgjet Pacolli i kërkon Qeverisë së Kosovës që t’i tregojë popullit se ku janë paratë e Trustit dhe Privatizimt. Në një shkrim në Facebook, ai përmend se politikanët që premtonin para votuesve hapje të vendeve të reja të punës, bazuar në fondet e trustit dhe privatizimit, sot nuk kanë një përgjigje se ku janë ato mjete.

Postimi i Pacollit në Facebook:

Çka po bëhet me paratë e Trustit dhe të Privatizimit?

Atëherë, gjatë fushatës zgjedhore, kur disa liderë partiakë joshnin votuesit me premtime, gjoja se do të formonin fonde për punësim, duke u bazuar në mjetet e trustit pensional dhe në ato pak mjete të grumbulluara nga privatizimi i pasurisë së Kosovës, unë isha i vetmi që mundohesha me iu sqaru qytetarëve se premtime të tilla janë vetëm mashtrim dhe se një gjë e tillë nuk është e realizueshme për shkak të mungesës së padronatit mbi ato mjete.

Nga ana tjetër, unë jam tejet i shqetësuar me fatin e mjeteve të trustit, duke ditur se mjetet e trustit sot janë të investuara në shumë kompani botërore, të cilave nuk u shkojnë punët mirë, për shkak të krizës globale.

Mjafton të shihet rënia e lirë e bursave nëpër kryeqytetet financiare dhe çdo gjë është e qartë se efekti kolateral i kësaj krize ka prekur me të madhe edhe paranë e qytetarëve të Kosovës, të investuar pa kritere dhe me hamendje. Kështu ka ndodhur edhe me paratë e privatizimit.

Është interesante se Qeveria jonë heshtë para një fakti të tillë, nga mungesa e atraktivitetit biznesor,mungesa e ideve, mungesa e aftësive manaxheriale etj.

Tregojuni popullit çka po bëhet me mjetet e tyre, ju lutem!!!