Pacolli: Qeveria Mustafa nuk ka njerëz që dijnë për “Trepçën”

Në lidhje me “Trepcën” ka reaguar edhe kryetari i AKR-së, Behgjet Pacolli, ku ka kritikuar Qeverinë aktuale duke thënë se e njëjta përbërje kishte bllokuar kohë më parë projektligjin për rikthimin e “Trepçës” në pronësi të shtetit për shkak të inateve urrejtjes patetike, siç thotë Pacolli, ndaj tij dhe AKR-së.

“Siç e dini, projektligji për Trepçën, i punuar sipas rregullave të tregut që parashihej që Trepça të tërhiqet nga Agjencia Kosovare e Privatizimit (AKP) dhe t’i kthehet në pronësi minatorëve të Trepçës (pronësi të Kosovës), kaloi nga qeveria e asokohe dhe mbeti në Kuvend për shkak se u bojkotua nga njerëzit te cilët sot qeverisin me Republikën e Kosovës. Janë të njëjtit individë që atëherë e bllokuan këtë projektligj, ata që sot flasin për Trepçën, derisa atëherë talleshin për shkak të inateve e urrejtjes patetike që kishin, në rend të parë, për mua personalisht dhe për AKR-në”, ka shkruar Pacolli në Facebook.

Sipas tij Qeveria Mustafa nuk ka njerëz që kanë njohuri për Trepqën.

“Unë e di dhe ju garantoj qytetarëve të Kosovës se kjo qeveri, këta njerëz që sot flasin për Trepçën, nuk kanë as ide e as projekt për Trepçën. Ata vetëm flasin dhe nuk kanë ide si funksionon një ndërmarrje e tillë në ekonominë e lirë të tregut global. Ndoshta ata ende nuk e din se faktori ‘koha’ dhe ‘njeriu’ është shumë me rëndësi. ‘Gjërat përkryhen nga njerëzit e duhur në momentin e duhur’. Atëherë ishte momenti shumë i duhur dhe ishin njerëzit e duhur, njerëzit e ekonomisë me plot dituri e përvojë e më projekt praktikë në dorë”, ka shkruar Pacolli.