Kryeministri Hashim Thaçi ka punuar i qetë të martën, pavarësisht se partneri kryesor i koalicionit, Behgjet Pacolli është ‘mllefosur” me zhvillimet e fundit në Agjencinë Kosovare të Privatizimit. Vetëm një ditë më parë nga kjo agjenci është larguar përfaqësuesja e Ambasadës amerikane në Prishtinë.
Për rrjedhojë, Pacolli ka kërkuar edhe shkarkimin e kryetarit të AKP-së, Blerim Rexha. Por, kjo kërkesë sipas zyrtarëve të lartë të AKR-së, nuk duhet kuptuar si kërcënim për prishje të koalicionit, siç është raportuar në disa media vendëse.
Zv/kryeministrja që vjen nga AKR, Mimoza Kusari- Lila, ka thënë të martën për “Tribunën” se zhvillimet e fundit në AKP janë shumë shqetësuese, por, sipas saj, me kreun e AKP-së, Blerim Rexha, duhet të merret Kuvendi i Kosovës që e ka emëruar atë dhe bordin e drejtorëve në këtë institucion.(Tribuna)
