Pacolli ngre alarmin për bllokimin e Aeroportit të Vlorës: Po dëmtohet ekonomia, investimet strategjike dhe imazhi i Shqipërisë

Prishtinë – Situata e krijuar rreth punimeve në Aeroportin e Vlorës ka marrë përmasa shqetësuese dhe kërkon reagim të menjëhershëm institucional. Kështu ka deklaruar biznesmeni dhe investitori i njohur Behgjet Pacolli përmes një deklarate publike, ku shpreh shqetësimin e tij për bllokimin e vazhdueshëm të punimeve në një prej projekteve më të mëdha infrastrukturore dhe strategjike në Shqipëri.

Kur një projekt strategjik me rëndësi kombëtare, i ndërtuar mbi një investim prej qindra milionë eurosh dhe mbi pritshmëritë e mijëra qytetarëve për zhvillim ekonomik e punësim, përballet me bllokada të vazhdueshme dhe pengesa të kontestuara ligjërisht, alarmi nuk është më vetëm i investitorit. Ai bëhet alarm për shtetin, ekonominë dhe besueshmërinë e vendit përballë investitorëve vendas dhe ndërkombëtarë.

Pikërisht në këtë frymë ka reaguar biznesmeni dhe investitori i njohur Behgjet Pacolli, duke ngritur shqetësimin për situatën e krijuar në Aeroportin e Vlorës, një prej projekteve më ambicioze infrastrukturore në Shqipëri. Sipas tij, bllokimi i punimeve që prej muajit maj jo vetëm që po shkakton humbje të konsiderueshme financiare, por po cenon seriozisht klimën e investimeve, sigurinë juridike dhe imazhin e Shqipërisë si një vend që garanton zbatimin e ligjit dhe mbrojtjen e investimeve strategjike.

Në një deklaratë publike, Pacolli ka kërkuar ndërhyrjen urgjente të institucioneve të drejtësisë dhe organeve ligjzbatuese, duke theksuar se zvarritja e kësaj situate po prodhon pasoja të rënda ekonomike, sociale dhe reputacionale për vendin.

Sipas deklaratës, që nga data 18 maj 2026, punimet në Aeroportin e Vlorës janë penguar dhe bllokuar nga veprime të ndërmarra nga një grup personash, të cilat, sipas vlerësimit të kompanisë koncesionare MABCO, bien në kundërshtim me ligjin dhe me vendimet e formës së prerë të Gjykatës së Apelit dhe Gjykatës së Lartë.

Pacolli thekson se ky bllokim po shkakton pasoja të konsiderueshme për interesin publik, ekonominë kombëtare dhe zhvillimin e rajonit, duke ndikuar drejtpërdrejt edhe në projektin që financohet nga investitori koncesionar MABCO.

“Ky bllokim po shkakton dëme të konsiderueshme dhe të vazhdueshme ndaj interesit publik, ekonomisë kombëtare, komunitetit lokal dhe investitorit koncesionar MABCO, i cili ka marrë përsipër dhe vazhdon të përballojë i vetëm barrën financiare të projektit, me një investim dhe angazhim shumëvjeçar që tejkalon vlerën prej 310 milionë eurosh me anë të injeksioneve kapitale, punimeve dhe garancive financiare”, thuhet në deklaratë.

Më tej, Pacolli paralajmëron se vonesat në përfundimin dhe vënien në funksion të aeroportit po krijojnë pasoja serioze për zhvillimin ekonomik të zonës dhe po dëmtojnë reputacionin e Shqipërisë si destinacion për investime strategjike.

Sipas tij, pengesat nuk burojnë nga investitori, por nga veprime dhe procedura që kanë sjellë vendime kontradiktore dhe juridikisht të kontestuara nga gjykata të shkallës së parë, të cilat në praktikë kanë penguar ekzekutimin e vendimeve të instancave më të larta gjyqësore.

“Duhet të theksohet se vonesat në realizimin e projektit nuk burojnë nga investitori, por nga veprime dhe procedura që kanë sjellë nxjerrjen e një sërë vendimesh kontradiktore dhe të kontestuara juridikisht nga gjykata të shkallës së parë, të cilat, në praktikë, kanë penguar ekzekutimin e vendimeve të instancave më të larta gjyqësore. Kjo situatë ka krijuar pasiguri juridike dhe ka cenuar parimet themelore të hierarkisë së vendimeve gjyqësore dhe të sigurisë juridike”, thuhet në reagim.

Në deklaratë vlerësohet se vendime të tilla, të mbështetura nga veprime të personave të caktuar dhe të formalizuara përmes akteve gjyqësore përkatëse, përbëjnë shkakun kryesor të dëmeve ekonomike të shkaktuara deri më tani, ndërsa njëkohësisht cenojnë autoritetin e sistemit të drejtësisë, rendin kushtetues dhe besimin e qytetarëve në shtetin ligjor.

Pacolli shpreh shqetësim edhe për përfshirjen e mundshme të strukturave shtetërore në disa nga këto procese, duke kërkuar verifikim dhe hetim të plotë institucional për të garantuar ligjshmërinë dhe mbrojtjen e interesit publik.

Në fund të deklaratës, ai u bën thirrje organeve të rendit, Prokurorisë dhe institucioneve përgjegjëse që të veprojnë me urgjencë për zhbllokimin e punimeve, garantimin e zbatimit të vendimeve gjyqësore të formës së prerë dhe hetimin e plotë të çdo veprimi apo mosveprimi që ka kontribuar në krijimin e kësaj situate.

“Çdo person që rezulton të ketë vepruar në kundërshtim me ligjin, të ketë shpërdoruar kompetencat e tij apo të ketë penguar zbatimin e vendimeve gjyqësore duhet të mbajë përgjegjësi në përputhje me legjislacionin në fuqi”, theksohet në deklaratë.

MABCO, sipas Pacollit, mbetet e gatshme të bashkëpunojë me të gjitha institucionet shtetërore, duke ofruar dokumentacionin dhe informacionin e nevojshëm për zbardhjen e plotë të rastit.

Në përmbyllje, shprehet besimi se organet ligjzbatuese dhe institucionet e drejtësisë do të veprojnë me profesionalizëm, paanshmëri dhe vendosmëri për të hetuar këtë rast, i cili sipas deklaratës ka shkaktuar dëme të mëdha ekonomike, sociale dhe reputacionale, duke prekur interesin publik, klimën e investimeve dhe besimin e qytetarëve në funksionimin e shtetit të së drejtës./rajonipress/