Pacolli: Në AKR nuk ka njerëz të korruptuar

Aleanca për Kosovë të Re është subjekti i vetëm që asnjëherë nuk i ka gënjyer qytetarët. Në AKR nuk ka njerëz të korruptuar, nuk jemi të shantazhuar, nuk frikësohemi dhe nuk jemi njerëz të skenarëve dhe propagandave të rrejshme. Kështu ka thënë lideri i AKR-së, Behgjet Pacolli, para simpatizantëve të AKR-së në qendrën e fshatit Sllovi të Lipjanit.

Ai ka qëndruar të premten në këtë komunë ku ka hapur fushatën zgjedhore të AKR-së.

“Meqë nuk kemi gënjyer kurrë qytetarët kemi arsye që të kërkojmë votën para qytetarëve”, ka thënë Pacolli.

Ai para lipjanasve ka thënë se me votën për numrin 40 do të votohet programi më i mirë qeverisës.

“Jam i sigurt se ju me votën për numrin 40 do të voton edhe për programin më të mirë për zhvillimin ekonomik të vendit”, ka thënë Pacolli.

Në tubimin e qytetarëve të Sllovisë, ka folur edhe kandidati për deputet në Kuvendin e Kosovës na AKR, Ardian Bytyçi.

Ai ka shprehur bindjen e tij të plotë se vota e Lipjanit do të jetë votë për AKR-në dhe votë drejt një shteti ligjor dhe pa korrupsion. “Lipjani më 8 qershor do të votojë për AKR-në dhe njerëzit e suksesit, për Kosovën pa korrupsion, pa nepotizëm dhe pa ndërhyrje në drejtësi”, ka thënë ai.