Pacolli ndihmoi aktoren e ndjer Zyrafete Gashi me 100 mijë euro

Biznesmeni Behgjet Pacolli, njëherësh edhe zëvendëskryeministër i vendit, njihet për veprimet e tij humanitare njerëzve në nevojë. Ai të paktën me dhjetëra herë, ka ndihmuar njerëz dhe iniciativa që kanë pasur qëllim ndihmën për shërim jashtë vendit.

Një veprim të tillë human ai e ka bërë edhe së fundmi me aktoren e humorit Zyrafete Gashi-Zyra, e cila vdiq ditë më parë nga një sëmundje e rënd.

Zyra e cila prej kohësh vuante nga kanceri, kohëve të fundit kur sëmundja po e mundte kishte shkuar për mjekim në Zvicër. Por as atje, ku mjekësia herë – herë bënë të pamundurën, nuk u gjet ilaç për të, dhe mjekët zviceran, u dorëzuan.

Aktorja shprehte dëshirë, që orët e fundit të jetës t’i kalonte në shtëpinë e saj në Prishtinë, dhe kjo iu mundësua.
Burime të afërta me familjen Gashi, të reporterit, bëjnë të ditur humanisti Behgjet Pacolli, nuk ka kursyer asgjë nga vetja e tij, për ta ndihmuar aktoren e njohur.

Ai kishte vënë në dispozicion aeroplanin e tij privatë në kthimin e Zyrës, nga Zvicra në Kosovë.

“Me aeroplanin privat të Behgjet Pacollit e kemi sjellë në Kosovë. Aty përveç dy vëllezërve të Pacollit dhe pilotit të aeroplanit, në përcjellje të Zyrës, kanë qenë edhe një mjek dhe një infermiere nga Zvicra”, ka thënë ky burim, duke shtuar se të gjitha këto shpenzime, dhe të tjera i ka hequr vetë zoti Pacolli.

Ky burim ka bërë të ditur gjithashtu se Pacolli, përveç aeroplanit privat ka shpenzuar rreth 100 mijë euro, në ndihmë mjekimit të aktores Zyra.

Humoristja shqiptare Zyrafete Gashi – Zyra ka vdekur të martën mbrëma, në moshën 57-vjeçare. Ajo ka vuajtur nga një sëmundje e rëndë, ndërsa për nëntë muaj ishte për shërim në Zvicër.