Pacolli mirëpret Bekim Jasharin dhe Halil Kastratin në Lugano: Një ditë miqësie, respekti dhe vlerash shqiptare

Biznesmeni dhe filantropi Behgjet Pacolli ka kaluar një ditë të veçantë në Lugano të Zvicrës, ku ka mirëpritur dy figura të njohura të jetës publike shqiptare, humanistin Halil Kastrati dhe kryetarin e Fondacionit “Adem Jashari”, Bekim Hamëz Jashari.

Përmes një postimi në rrjetet sociale, Pacolli ka bërë të ditur se takimi u zhvillua në ambientet piktoreske të liqenit të Luganos, duke e cilësuar atë si një ditë të bukur relaksi, miqësie dhe bashkëbisedimi mes njerëzve që ndajnë të njëjtat vlera njerëzore dhe kombëtare.

“Sot pata kënaqësinë dhe nderin të kaloj një ditë të bukur e relaksuese në liqenin magjik të Luganos, në shoqërinë e mysafirëve të mi të çmuar, humanistit Halil Kastrati dhe mikut tim të madh, Bekim Hamëz Jashari. Miq të dashur, ju uroj të gjithëve një mbrëmje të qetë, të bukur dhe plot mirësi”, ka shkruar Pacolli.

Takimi mes Pacollit, Kastratit dhe Jasharit është parë si një moment që pasqyron lidhjet e forta ndërmjet personaliteteve shqiptare, të cilët, secili në fushën e tij, kanë dhënë kontribut të rëndësishëm në biznes, humanizëm dhe ruajtjen e vlerave kombëtare./rajonipress/