Pacolli, Mejdani dhe Moisiu bashkë për “Unionin ekonomik shqiptar”

“Një Bashkim i ekonomisë shqiptare duhet të ndodhë”. Kështu u vlerësua në konferencën e sotme të iniciuar nga zëvendëskryeministri i parë i Kosovës Behgjet Pacolli.

Një ide që në vitin 2007 e nisi Arbën Xhaferi, e të cilën pastaj s’mund të vazhdojë me jetësimin e saj, këtë do ta bëjnë tash, Behgjet Pacolli, zëvendëskryeministri i Kosovës, dhe ish presidentët Alfred Moisiu dhe Rexhep Mejdani, që janë duke punuar për këtë gjë.

Ideja e themelimit të një lëvizje për një treg të përbashkët unik shqiptarë, u vazhdua sot me kërkesën e institucionalizimit të këtij unioni, e që synimi kryesorë është bashkimi ekonomik mes Kosovës dhe Shqipërisë.

Zëvendëskryeministri Behgjet Pacolli dhe ish Ministri i ekonomisë dhe Financave, të Shqipërisë, Arben Malaj i kanë bërë kërkesë zyrtare qeverisë së Shqipërisë dhe të Kosovës, që të hartojnë strategjinë e përbashkët për zhvillim ekonomik.

Pacolli me këtë rast ka thënë se është shumë i inkurajuar dhe ka garantuar se do të punojë për këtë ide edhe nga ana qeveritare.

“Do të punoj pra edhe në anën tjetër që kjo ide të jetë një gjë e akceptuar edhe nga kolegët e mi në qeverinë e Kosovës dhe kërkoj po ashtu nga shkëlqesitë nga Shqipëria, që të ndikojnë edhe në qeverinë e Shqipërisë që këto ide të bëhen realitet”, ka theksuar Pacolli.

Ndërsa Arben Malaj ish ministri i financave, i ekonomisë së Shqipërisë, mbështetës i kësaj ideje, theksoi se kjo ide është që këto dy shtete të mund të krijojnë ekonomi unike, që të shfrytëzojnë pozitivisht gjithë historinë në rrugën e suksesshme që ka ndjekur bashkimi evropian.

Ndërkohë, në këtë konferencë është promovuar edhe libri “Bashkimi nis nga Ekonomia”. Ne të cilin libër janë paraqitur punimet e 20 autoriteteve më nam shqiptar, rreth të mirave të përbashkëta ekonomike që mund të ketë mes Kosovës dhe Shqipërisë

Behgjet Pacolli, me këtë rast theksoi se ky libër është një përmbledhje e njerëzve të vullnetit, dhe profesionist që kanë mbështetur iniciativën.

“Ne duhet të bashkohemi ekonomikisht, dhe interesi ynë është që të kontribuojmë mirëqenie për qytetarët e Kosovës. Ne duhet të kemi hapësirë më të madhe ekonomike. Çdo investim në rrafshin ekonomik në Shqipëri do të jetë shumë e vogël për tregun ne Shqipërisë dhe po ashtu edhe në Kosovë, prandaj nëse konsiderojmë hapësirën e të gjithë shqiptarëve ku ata jetojnë do të jetë një hapësirë shumë e madhe, dhe më interesante në rajon. Pse ne duhet ta kufizojmë zhvillimin ekonomik deri te kufiri. Ne duhet të mendojë një hapësirë për të gjithë shqiptarët”, ka theksuar Pacolli.(ORAinfo)