Pacolli: Mbetem në politikë për Kosovën, jo për veten
Kreu i AKR-së dhe zv/kryeministri i Kosovës, Behgjet Pacolli në një intervistë për RTK-në ka folur gjerë e gjatë për të gjitha çështjet aktuale në vend, derisa është ndalur më shumë te problemet ekonomike në vend.
Ai ka thënë nuk është i kënaqur me zhvillimin ekonomik të vendit, derisa ka premtuar së një gjë e tillë do të bëhet nëse atij i lihen duart e lira, duke aluduar në më shumë hapësirë në qeverinë e Kosovës.
Pacolli më konkretisht ka folur për gjigantin metalurgjik të Kosovës, “Trepçën”, duke e shtjelluar edhe një herë idenë e tij për këtë kompleks. Sipas tij, nëse realizohet ideja e tij që të riorganizohet ky gjigant, atëherë “Trepça” duhet të hiqet nga kthetrat e Agjencisë Kosovare të Privatizimit dhe Odës së Veçantë të Gjykatës Supreme të Kosovës.
Në kuadër të këtij propozimi Pacolli ka thënë se pjesa minerare e këtij gjiganti nuk duhet të privatizohet, por të organizohet në një shoqëri aksionare. Gjithashtu si model ai ka propozuar edhe partneritetin privato-publik dhe themelimin e Agjencionit të Participimeve, si dhe të Grupit Menaxhues Ndërkombëtar.
Kreu i AKR-së ka folur edhe për proceset politike në vend dhe zgjedhjet lokale që do të mbahen më 3 nëntor. Pacolli është shprehur i zhgënjyer me bllokimin e reformës zgjedhore, nga, sic ka thënë ai, kreu i PDK-së dhe ai i LDK-së, edhe pse që të dy janë nënshkrues të marrëveshjes që presidenti të zgjidhet drejtpërdrejt nga vota e popullit, transmeton orainfo.
Sa u përket zgjedhjeve lokale, numri dy i qeverisë ka thënë se partia që udhëheqë ai është e gatshme që qytetarëve t’ua ofroj ofertën më të mirë, derisa ka shtuar se pret rritje të elektoratit në tërë Kosovën me theks të veçantë në Kamenicë, Prishtinë, Gjakovë, Podujevë, etj.
I pyetur për kandidatin e AKR-së për Prishtinën, Pacolli ka thënë se ky emër së shpejti do të bëhet publik dhe se do të jetë kandidati më i mirë që ka partia.
“Prishtinën do të menaxhimin në mënyrën më të mirë, duke e rikthyer tek qytetarët dhe duke e bërë qytet si i ka hije një kryeqendre”, ka thënë ai.
Lidhur me angazhimin e tij në politikë nga një biznesmen me përmasa botërore dhe të ardhmen e tij, Pacolli ka qenë i prerë në përgjigje: “Mbetëm në politikë për Kosovën, jo për vetën”.
Sa i përket politikës së jashtëm, zv/kryeministri i parë ka thënë se është i kënaqur me numrin e njohjeve, por nuk do të ndalet me kaq.
“Nga 14-16 gusht do të udhëtoj në kontinentin afrikan bashkë me ministrin e Jashtëm, zotin Enver Hoxhaj, ku do t’i vizitojmë disa nga shtetet e këtij kontinenti. Para së të hyjë në këtë emision mora konfirmimin për vizitë në Kenia ku pres që të marrim njohjen për Kosovën nga ky vend i rendesishëm i Afrikës”, ka thënë Pacolli, duke shtuar se në kuadër të turneun afrikan ka paraparë vizita edhe në Mozambik, Zambi, Kongo dhe Afrikë të Jugut”.