Pacolli, liderëve të shtetit: Jeni duke e shkatërruar Kosovën

Presidenti i Aleancës Kosova e Re (AKR), Behgjet Pacolli, ka akuzuar liderët shtetërorë për lejimin e vendosjes së shtatores së Car Llazarit në veri të Mitrovicës.
Pacolli ka shkruar në profilin e vet në “Facebook” se Thaçi, Veseli dhe Mustafa, nuk janë duke ndërtuar shtet, por janë duke e shkatërruar Kosovën në çdo aspekt.

Postimi i plotë i Behgjet Pacollit:

President, kryeministër, kryeparlamentar, pse Car Llazari në Mitrovicë?

“Sot në Mitrovicë u vendos shtatorja e simbolit të dhunës dhe shovinizmit të çetnikëve serb ndaj shqiptarëve dhe jo vetëm, pra shtatorja e Car Llazarit. O pushtetas, a e dini ju se si ndjehen të gjithë njerëzit e Kosovës sot? A e din se si ndjehen familjet e atyre që u vranë e u masakruan nga ata që për frymëzim në kryerjen e krimeve ndaj popullit tonë, e kishin Car Llazar. Ju, pse e lejuat Car Llazarin në Mitrovicë? Sa servil jeni, Zot runa! A keni përgjegjësi e ndjenja? Ku është politikëbërja dhe diplomacia e juaj që e keni çdo ditë në gojën e juaj por në fakt vetëm keni dëgjuar për to. Një e di fare mirë; Ju nuk jeni duke ndërtuar shtet por jeni duke shkatërruar Kosovën në çdo aspekt.