Pacolli: Kush e kundërshton deklaratën e Delawiet, nuk e do Kosovën

Ish zëvendëskryeministri i Kosovës, Behgjet Pacolli, është shprehur i habitur se si në Kosovë ka njerëz që mund ta kontestojnë atë që Ambasadori Amerikan, Greg Delawie, tha dje pas ngjarjeve në Kuvend.

Pacolli, përmes faqes së tij në Facebook, ka thënë se deklarata e Delawie është një deklaratë të cilën do ta thoshte çdo njeri i arsyeshëm.

“Ambasadori nuk kurseu askënd pa marrë parasysh partitë politike dhe ngriti zërin për ata që e dëmtojnë Kosovën, dhe zhvillimin e jetës demokratike në Kosovë, ashtu siç do të duhej të ishte qëndrimi i secilit që e do Kosovën”, tha Pacolli.

Ai potencoi se çdokush që i kundërshtohet kësaj deklarate, në një apo tjetër mënyrë, nuk e do Kosovën.