Pacolli: Krerët e shtetit duhet të shkojnë në veri

Presidenti i AKR-së, Behgjet Pacolli, ka thënë se vizitat e përfaqësueseve të institucioneve të vendit në veri duhet të jenë rutinë.

Pacolli në profilin e tij në “Facebook”, duke iu referuar shkrimeve të fundit në medie se krerët e Republikës së Kosovës mund të shkojnë në veri vetëm duke marrë leje në Beograd, ka thënë se ai kur ishte president i vendit ka vizituar veriun dhe nuk e ka pyetur askënd.

“Ditët e fundit gazetat po shkruajnë se krerët e Republikës së Kosovës mund të shkojnë në veri vetëm duke marrë leje në Beograd. Nuk dua ta besoj dhe e konsideroj të papranueshëm këtë lajm. Nëse do të ishte i vërtetë do t`i pyesja seriozisht: si e konsiderojnë liderët tanë atë pjesë të Kosovës dhe kënd e përfaqësojnë ata? Në tri vizitat si president i vendit, në muajin e parë të punës sime në pikat kufitare në veri të Kosovës dhe në qendrat e banuara më së shumti nga qytetarët e etnisë serbe (shikoni fotot), u shfaq fuqishëm shteti ynë, shteti i Kosovës. Unë askënd nuk e pyeta për ta vizituar veriun (Mitrovicën e veriut dhe kufijtë e shtetit në veri). Për mua vizitat në veri të Kosovës duhet të jenë rutinë, asgjë e jashtëzakonshme dhe për to nuk duhet të kërkohet leje prej askujt”, ka shkruar Pacolli.