Pacolli i del në krah rektorit Gashi

Kryetari i AKR-së, Behgjet Pacolli, përmes një statusi në profilin e tij në rrjetin social “Facebook” i ka dalë në ndihmë rektorit të UP-së, Ibrahim Gashi, i cili ka qenë pjesë e këtij subjekti politik para se të marrë postin e rektorit.

E në të njëjtin status Pacolli, që është edhe zëvendëskryeministër i parë në Qeverinë e Kosovës, ka kritikuar kolegët e tij politikanë për atë që e ka quajtur hiperinflacion të titujve akademikë.

“Jam tronditur nga hiperinflacioni i titujve akademikë me të cilët mbushen supet e tyre edhe shumë kolegë politikanë, drejtues institucionesh të gjyqësorit bile të shkalles më të lartë, etj. Këta akademikë fiktivë po prodhojnë kuadro fiktivë dhe po e helmojnë shoqërinë për të nesërmen e shtetit të Kosovës. Me këtë shqetësim po e ndjek dhe protestën e studenteve që janë në të drejtën e tyre. Por nuk duhet të kemi kurban. Rektori aktual nuk duhet të bëhet kurban për gjithë akademikët e rrejshëm të Kosovës”, ka shkruar Pacolli në “Facebook”.

Më tej zëvendëskryeministri ka propozuar një zgjidhje për të dalë nga situata e krijuar.

“Duhet krijuar një ekip të urtësh me profesorë të vjetër të viteve 70-ta që të marrin në shqyrtim gjithë rastet e dyshimta të karrierës së përshpejtuar akademike”.

Pacolli ka shkruar edhe për gradën e tij akademike.

“Personalisht kurrë s’jam mburrur me titullin e magjistrit (master) të përkryer në Institutin Mössinger krahas përfundimit të një Universitetit të Hamburgut për Ekonomi ndërkombëtare. Një është e sigurt; viteve të 70-a nuk ka ekzistuar termi shitblerje e titujve akademik. Ndoshta dikush mu për këtë, në media, me quan i pashkollë! Nuk hidhërohem fare se atë titull e kam arritur me djersë e mund, duke qenë i vetëdijshëm se nuk kam aplikuar askund për të qenë ligjërues i gjuhës shqipe (nuk kam studiuar në gjuhën shqipe e nga adoleshenca drejtë nga Mareci kam vepruar jashtë Kosovës, për fat të keq)”, ka shkruar Pacolli.