Pacolli: Beogradit t’i bëhet trysni për policat e sigurimit

Rrahim Pacolli, si anëtar i ekipit teknik për çështje të policave të sigurimit të Kosovës, ka bërë të ditur se marrëveshja për lirinë e qarkullimit të qytetarëve e cila është arritur gjatë bisedimeve në Bruksel, nuk e ndan shtetin në veri dhe jug por si e tillë vlen për tërë vendin njësoj.

“Dua të theksoj se ishin takime mjaft të gjata dhe me tensione dhe kishte kundërshtime të mëdha nga pala serbe e cila fuqishëm kundërshtonte hyrjen e veturave me targa të Kosovës në territorin e Serbisë, megjithatë pas shumë takimeve, ne arritëm një marrëveshje e cila garantonte lirinë e qarkullimit të qytetarëve ku ishte dakorduar që veturat e të dyja shteteve të mund të qarkullonin pa problem në territoret e dyja shteteve, duke paguar fillimisht policat e sigurimit kufitar në hyrje të çdo shteti”, ka shpjeguar ai për Tribunën.

Orkestrimet dhe manipulimet që tash po i bën Beogradi me qytetarët e veriut, sipas tij, nuk i shkojnë në dobi asnjërës palë, andaj siç ka thënë ai, duhet bërë më shumë trysni Beogradit që t’i respektojë marrëveshjet e arritura në Bruksel. Pacolli ka thënë se implikimet financiare nuk janë shumë të rëndësishme sa është i rëndësishëm parimi i barazisë në kuptimin që askush nuk duhet të privilegjohet apo diskriminohet për shkak të nacionalitetit, racës, fesë, etnisë etj….(Tribuna).