Pack: Kosovës i duhet një qeveri e fortë

Eurodeputetja gjermane, Doris Pack, ka thënë se zgjedhjet po mbahen sepse kanë qenë të nevojshme. Ajo gjithashtu thotë se shpreson që shumë qytetarë të Republikës së Kosovës do të marrin pjesë në këtë proces, duke shtuar se në veçanti është shumë e rëndësishme pjesëmarrja e qytetarëve të veriut.

“Kosovës i duhet një qeveri e fortë, që e ka përkushtimin e mjaftueshëm që të bëjë reformat e nevojshme aq të nevojshme për Kosovën, por edhe për marrëdhëniet me fqinjët. Kjo është jashtëzakonisht e rëndësishme për të gjitha vendet e rajonit e në veçanti për ne, për Bashkimin Evropian që e duam një rajon të qetë në Ballkan.

Ka shumë probleme me të cilat qeveria e re duhet të merret. Luftimi i korrupsionit, krimit të organizuar dhe rastet që pritet t’i trajtoj Gjykata Speciale, të gjitha këto çështje presin zgjidhje. Nuk do të veçoja asgjë. Të gjithë e dinë se çka duhet bërë në Kosovë.

E për tu bërë të gjitha veprimet e nevojshme juve ju duhet një parlament funksional me një shumicë të konsiderueshme dhe opozitë konstruktive, e që të dyja palët janë të përkushtuara për t’i quar deri në fund reformat e nevojshme.

Unë u bëj thirrje qytetarëve të Kosovës që të dalin dhe të votojnë dhe në këtë mënyrë të zgjedhin subjektet që ata mendojnë se më së miri do të mund të punojnë në interes të së ardhmes së qytetarëve të Kosovës por edhe rajonit”, ka thënë Pack në një intervistë për Radio Dukagjinin.