Pacientët në komë problem për QKUK-në

Në shumë vende, pacientët të cilët bien në komë vigjilje, trajtohen në qendra të posaçme, rehabilituese apo edhe në shtëpi. Në Kosovë këto raste, trajtohen në qendra hospitalizuese. Kështu ndodh meqë familjarët hezitojnë të kujdesen në shtëpi për këtë kategori pacientësh.

Familjarët e pacientëve të cilët kanë rënë në koma vigjilje hezitojnë t’i marrin ata për trajtim të mëtutjeshëm në shtëpi. Njëri nga të intervistuarit tonë thotë se ka frikë ta heq familjarin e tij nga QKUK-ja me arsyetimin se nuk di të kujdeset për të.

“Na jetojmë në Istog e atje as nuk ka specialistë për këtë lëmi se këtij i vyen neurolog. Tash të gjithë e kanë mësy QKUK e qaty po më bind edhe s’po muj me besu me qu në Pejë ose në shtëpi”, thekson ai.

Dr. Lulëzim Emini thotë se pacientët të cilët bien në komë vigjilje jo medoemos duhet të qëndrojnë në QKUK. Ka raste kur këta pacientë mund të qëndrojnë edhe në shtëpi, por sipas Eminit familjarët kanë frikë të përkujdesen në shtëpi.

“Trajtimi i këtyre pacientëve kur mbërrijnë në këtë gjendje ata mund të trajtohen edhe nga vet familjarët ,mirëpo gjithmonë te familjarët ekziston frika se nuk do të munden ta bëjnë një gjë të tillë se mund të vije deri te ndonjë komplikim i mundshëm dhe për këtë arsye këta pacientë zakonisht stacionohen dhe për këtë arsye mbesin një kohë të gjatë në qendrën klinike duke e ngarkuar edhe stafin profesional mjekësor si dhe atë të kuadrit të mesëm, tha Emini për Radio Kosovën.

Drejtori mjekësor në QKUK, Nexhmedin Shala thotë se në shumë rase kur i kanë liruar këta pacientë për në shtëpi kanë hasur në rezistencë nga familjarët.
“Kemi pas raste ku familjarët e kanë keqpërdor autoritetin e eprorëve tonë të themi kështu që gjëja ne dom të bëjmë diçka që nuk është etike, që po dom me dëmtu shëndetin, në mënyrë të qëllimshme kush e di se për çfarë hesapesh edhe atëherë kanë ndërhy me qeveri me ministri dhe është dashtë që ata njerëz t’i kthejmë prapë aty ku janë ose ka pas raste kur ne i kemi liruar në shtëpi. Kanë thirr media duke akuzuar stafin mjekësor që gjoja kanë bërë krim që s’është etike po i qesin etj etj”, thekson ai.

Mjekët thonë se fatkeqësisht këta pacientë janë pa perspektivë dhe i vetmi kujdes për ta është ushqimi përmes sondës dhe aspirimi, andaj preferohen qendrat rehabilituese.

Ndonëse në QKUK nuk ka shumë raste të tilla, ata qëndrojnë me vite të tëra në këtë qendër terciare./Indeksonline/