Osmani nga Riadi njofton se Siria ka njohur Kosovën, thotë se ndihmoi Princi saudit i Kurorës

Presidentja Vjosa Osmani ka bërë të ditur se shteti i Sirisë ka njohur pavarësinë e Kosovës.

Ajo tha se arritën marrëveshje me mbështetjen e Princit të Kurorës së Arabisë Saudite dhe falënderoi Presidentin Al Sharaa për vendimin për njohje të Kosovës.

Njoftimi i plotë:

Siria njeh Kosovën!

Me mbështetjen e Lartësisë së tij Mbretërore, Princit të Kurorës së Arabisë Saudite, Muhammed bin Salman Al Saud, sot ne Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës. Falënderoj Presidentin Al Sharaa për vendimin për njohje të Kosovës si dhe për mbështetjen e tij për popullin tonë.

Populli i Kosovës dhe ai i Sirisë kanë vuajtur e sakrifikuar shumë për ta arritur lirinë. Prandaj kjo njohje e ndërsjellë sot nuk është vetëm e sovranitetit shtetëror, por edhe njohje e sakrificës së shumë brezave për të jetuar të lirë.

Falënderoj Princin e Kurorës së Mbretërisë së Arabisë Saudite që e bëri të mundshëm këtë akt historik ndërmjet dy shteteve tona. ????

Tani Kosova njihet nga 120 shtete. Republika jonë po ecë përpara dhe nuk ka asgjë që mund ta ndalë!