Osmani: Marrëveshja me MCC-në, investimi më i madh në dekada për energji

Presidentja Vjosa Osmani ka thënë se marrëveshja e nënshkruar me Korporatën Sfidat e Mijëvjeçarit është investimi më i madh në sektorin e energjisë në disa dekada.

Ajo tha se këto para përveçse sjellin investime në fushën e energjisë, do t’iu garantojë edhe grave role kyçe në këtë drejtim.

“Në Kongresin e SHBA-ve, në prani të një numri të madh të miqve të Kosovës, u mbajt ceremonia e nënshkrimit të marrëveshjes me MCC-në për Progamin e Kompaktit. Kjo marrëveshje, në shumë prej 236.7 milion dollarë, përbën investimin më të madh në sektorin e energjisë në Kosovë pas disa dekadash. Këto projekte do të kontribuojnë në garantimin e stabilitetit dhe fleksibilitetit të sistemit energjetik të Kosovës gjersa përgatitemi për tranzicionin energjetik dhe integrim më të madh të burimeve të ripërtëritshme të energjisë. Ky investim do të garanatojë po ashtu një të ardhme energjetike ku gratë do të kenë rol kyç dhe do të jenë kontribuese aktive në adresimin e sfidave të së ardhmes në fushën e energjisë”, ka thënë Osmani.

Ajo shtoi se nënshkrimet e vëna nga Kosova dhe korporata amerikane në një marrëveshje milionëshe është dëshmi partneriteti.

“Kjo marrëveshje konfirmoi edhe njëherë atë që dihet tashmë botërisht, partneritetin e jashtëzakonshëm e unik në mes të Republikës së Kosovës dhe Shteteve të Bashkuara të Amerikës. Faleminderit të gjithëve për punën e jashtëzakonshme!”.

Shpërndaje.
© RAJONIPRESS