Osmani heziton të dërgojë ngërçin në Kushtetuese – Presidenca pa përgjigje për veprimet e mëtejshme

Presidentja Vjosa Osmani po vlerësohet se e ka të drejtën që ta dërgoj në Gjykatën Kushtetuese, ngërçin e krijuar me konstituimin e Kuvendit. Nga Presidenca nuk janë përgjigjur gjatë ditës, se përse deri më tani nuk e kanë ndërmarrë një veprim të tillë.

Kështu tha e para e shtetit, më 15 maj kur i pati në takim konsultativ liderët e partive politike për bllokadën e Kuvendit.

Pavarësisht që kanë kaluar më shumë se një muaj nga ky takim, Osmani nuk vazhdoi me takime shtesë për zhbllokim të situatës.

Televizioni Teve1 i ka dërguar pyetje zyrës së presidencës, për të kuptuar nëse kanë në plan një takim të ri me liderët e partive politike, por të njëjtit nuk kanë kthyer përgjigje.

Ish gjyqtari i Gjykatës Kushtetuese, Kadri Kryeziu thotë se Osmani e ka mundësinë për të i dhënë fund kësaj bllokade.

Edhe profesori Mazllum Baraliu vlerëson se Osmani është duke bërë gabim që nuk poe ushtron këtë të drejtë.

Nga Presidenca e Kosovës pa përgjigje kanë qenë edhe në pyetjet se a do të dërgoj Osmani në Gjykatë Kushtetuese çështjen e Kuvendit të Kosovës.

Megjithatë, në disa deklarime të mëparshme për mediat, nga zyra e Presidencës kanë thënë se e kanë gati draftin për ta dërguar në Kushtetuese, vetëm se janë duke pritur se cila do të jetë përgjigja për rastin që AAK-ja e ka dërguar në Gjykatën Kushtetuese.