Osmani dhe Pratipati flasin për konsolidimin e Kuvendit dhe marrëdhëniet Kosovë – SHBA

Presidentja e Kosovës, Vjosa Osmani, ka pritur sot në takim të ngarkuarën me punë të Shteteve të Bashkuara të Amerikës në Kosovë, Anu Pratipati.

Në takim u diskutua për zhvillimet e fundit politike në vend, përfshirë zgjedhjen e kryetarit të Kuvendit dhe shumicës së nënkryetarëve, si dhe hapat e mëtejshëm drejt konstituimit të plotë të institucionit ligjvënës.

Palët po ashtu folën për bashkëpunimin dypalësh mes Kosovës dhe SHBA-së, duke rikonfirmuar gatishmërinë për avancimin e tij në fusha me interes strategjik për të dyja vendet.

Në prag të Javës së Nivelit të Lartë të Asamblesë së Përgjithshme të Kombeve të Bashkuara në New York, ku Presidentja Osmani do të marrë pjesë edhe këtë vit si kryesuese e delegacionit të Kosovës, u diskutua edhe për agjendën dhe pritshmëritë nga takimet dhe aktivitetet e planifikuara.