Osmani denoncon spastrimin etnik të shqiptarëve të Luginës nga shteti serb

Kryetarja e Kuvendit të Kosovës, Vjosa Osmani, ka thënë se shteti serb po mundohet të bëjë spastrim të heshtur etnik në Luginë të Preshevës.

Në një postim në Facebook, Osmani tha se çështja e shqiptarëve të Luginës duhet të adresohet gjithandej si shkelje e të drejtave të njeriut.

“Adresimi i çështjes së lirive dhe të drejtave të njeriut të shqiptarëve në Luginën e Preshevës duhet të bëhet në të gjitha instancat, brenda dhe jashtë vendit. Ky nuk është thjeshtë një problem i izoluar: veprimet e shtetit serb karshi shqiptarëve të Luginës, ngërthejnë në vete shkelje fundamentale të të drejtave të njeriut. Një shtet që aktivisht angazhohet në spastrim etnik, edhe pse me metoda të ‘sofistikuara’ siç është pasivizimi i adresave, nuk e meriton anëtarësimin në BE”, ka shkruar Osmani, transmeton Zëri.info

Ajo gjithashtu ka thënë se Medvegja është vënë në shënjestër të politikës serbe për të larguar secilin që flet shqip nga aty dhe, përveç kësaj, gjatë katër viteve të fundit, autoritetet serbe kanë fshirë mbi 4 mijë shqiptarë nga regjistri civil në këtë komunë.

“Megjithatë, përgjatë viteve të fundit, Medvegja është vënë në shënjestër të politikës serbe, duke tentuar largimin përfundimtar të çdokujt që flet shqip në ato anë. Gjatë vetëm katër viteve të fundit autoritetet serbe kanë fshirë mbi 4 mijë shqiptarë nga regjistri civil në komunën e Medvegjës”, ka shkruar kryetarja e Kuvendit të Kosovës, Vjosa Osmani.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).