Presidentja e Kosovës Vjosa Osmani, ka përkujtuar viktimat e gjenocidit.Përmes një postimi në Facebook, Osmani ka thënë se ky është një moment reflektimi për rrugën e vështirë nëpër të cilën ka kaluar vendi dhe çmimin e lartë që Kosova e ka paguar për liri.
Ajo tha se 13 mijë viktimat e luftës janë dëshmi e qartë se Serbia ka pasur për qëllim të na zhduk nga faqja e dheut.
“Dita ndërkombëtare e përkujtimit të viktimave të gjenocidit, 9 dhjetori, është moment reflektimi për rrugën e vështirë nëpër të cilën kemi kaluar dhe çmimin e lartë që kemi paguar për lirinë tonë. Ne nuk mund t`ia kthejmë shpinën të kaluarës sonë. Do ta kujtojmë atë si një preventivë që gjërat e tilla të mos përsëriten në cilindo cep të globit. E parandalimi ka parakusht drejtësinë. Akte gjenocidi nga Serbia ndodhën në sytë e botës. Janë mbi 13 mijë të vrarë në luftën e fundit në Kosovë, për të cilët sot ndjejmë dhimbje, para të cilëve përkulemi dhe të cilët do të kujtohen përherë. Ata janë dëshmi e krimit të gjenocidit dhe e qëllimit të qartë të Serbisë për të na zhdukur nga faqja e dheut”, ka shkruar Osmani. /Zëri
