OSBE dhe Ambasada Norvegjeze mbështesin Kamenicën me projekte konkrete

Kamenicë – Katër projekte të vogla do të implementohen këtë vit nga OSBE përmes fondeve të Ambasadës Norvegjeze në Komunën e Kamenicës. Vendosja e kamerave në Gjimnazin “Ismail Qemali”, vendosja e kamerave në shkollën “Fan S.Noli”, ndriçimi publik në qytet në lagjet “Malësia” e “Çamëria” dhe ndriçimi publik në Karaqevë të epërme, janë projektet që janë përzgjedhur nga OSBE për financim.

Nënkryetari i Kamenicës Fatmir Matoshi, ka thënë se është një ditë e bukur kjo për Kamenicën dhe një rezultat i mirë i arritur nga stafi i KLSP-ve në tre sektorët, policisë së Kosovës, Komunës dhe stafit të OSBE-së, Departamenti për Rend dhe Siguri Publike – sektori për zhvillim të sigurisë, zyrtaren e lartë zonjën Tinatin Bezhanishvilli dhe koordinatorin e projekteve Ruzhdi Korqa. “Këto projekte janë për të mirën e komuniteteve dhe komuna u është mirënjohëse OSBE-së, Ambasadës Norvegjeze dhe Ambasadorit Jan Braathu.

Komisioni përzgjedhës ka vendosur që në Kamenicë të vijnë katër projekte, ndërsa ne do të vazhdojmë edhe më tutje të bashkëpunojmë me të gjitha organizatat që kanë vullnetin ta përkrahin komunën tonë.

Kryetari Begzad Sinani dhe gjithë stafi i jemi përkushtuar ngritjes së imixhit të komunës dhe rritjes së besueshmërisë ndaj institucioneve si nga qytetarët e të gjitha komuniteteve ashtu edhe nga institucionet qendrore dhe ato ndërkombëtare” tha nënkryetari Matoshi./rajonipress/