Opozita zbutet me Qeveri teknike

Alternativa për tejkalimin e krizës politike në Kosovë. Për marrëveshjet me Serbinë propozohet moratorium.

Deputetët e bllokuar opozitarë janë të hapur për formimin e një kabineti qeveritar të përkohshëm deri në zgjedhjet e reja, nëse Qeveria aktuale nuk heq dorë nga Asociacioni dhe Demarkacioni

Përfaqësues të subjekteve politike opozitare janë të vendosur që edhe seanca e radhës, e caktuar për ditën e sotme 15 tetor, të pengohet në zhvillimin e rrjedhave normale të punës, si vazhdimësi e presionit mbi Qeverinë e Kosovës që të tërhiqet nga marrëveshjet e 25 gushtit me palën serbe.

Sipas opozitarëve, më pastaj duhet të vazhdohet beteja politike në Parlament në kushte normale në mes të pozitës opozitës, me vazhdimin e adresimit të çështjeve të tjera të dështimit të kësaj Qeverie, sikur që janë: moszhvillimi ekonomik i vendit, krimi i organizuar dhe korrupsioni i shtrirë gjithandej nëpër institucionet e shtetit.

Garancitë e dhëna nga kryeministri i vendit, Isa Mustafa, në takimin e fundit në Bruksel, se marrëveshjet e 25 gushtit, përfshirë edhe atë për formimin e Asociacionit të komunave me shumicë serbe, do të zbatohen pikë për pikë nga Qeveria e Kosovës, bënë që opozita të fokusohet në pamundësimin e realizimit të kësaj agjende të Qeverisë së Kosovës, me të gjitha format e pengimit të punës së saj, me përgatitjen edhe për variantin e fundit të kundërshtimit, protestat gjithëpërfshirëse popullore./kosova sot/