Opozita “pikë e pesë”

Mospajtimet ndërmjet subjekteve opozitare kanë bërë që të anulohet protesta e paralajmëruar për sot kundër Qeverisë “Mustafa”. Ramush Haradinaj ka deklaruar se nuk mund të pajtohet me veprimet e “Vetëvendosjes”.

Tri subjektet opozitare e kanë anuluar protestën e paralajmëruar për të shtunën. Opozita fillimisht paralajmëroi për mbajtjen e një konference për media ku krerët opozitarë do të bënin thirrje për pjesëmarrje në protestën e së shtunës, por më pas u njoftua për anulim të kësaj konference.

Megjithatë, konferenca u mbajt, por në vend të thirrjes për pjesëmarrje drejtuesit e opozitës njoftuan për anulimin e protestës. Në anën tjetër, analistët politikë kanë vlerësuar se ky është një sinjal për përçarjen e opozitës. Ata madje nuk e përjashtojnë mundësinë që ndonjëra nga partitë e opozitës t’i bashkohet koalicionit qeverisës.

Lideri i Aleancës për Ardhmërinë e Kosovës, Ramush Haradinaj, ka bërë të ditur se pas konsultimeve mes tri subjekteve opozitare është vendosur që protesta të shtyhet për një datë të pacaktuar.

“Kapja e shtetit është thelluar, meqë problemet që vijnë nga marrëveshje të gabuara vetëm sa po e rëndojnë Kosovën, pra, në vend kemi Komisionin ndërkombëtar për shënimin e vijës së kufirit. Ne vendosëm t’i kundërshtojmë këto procese. Kemi marrë vendim që protestën e paralajmëruar për nesër ta shtymë për një datë tjetër, pra, shtyrja është pikërisht për shkak të seriozitetit të temave, mos të implikojmë as me data, as me festë por as me rrethana tjera që munden me qenë të ndjeshme në këtë rrethana në të cilat po i kalojmë”, ka bërë të ditur Haradinaj./zeri/