Opozita, pa alternativë për kryenegociatorin

Tri paritë opozitare, Lidhja Demokratike e Kosovës, Lëvizja Vetëvendosje dhe Partia Socialdemokrate, e vlerësojnë presidentin Hashim Thaçi si të papranueshëm për kryenegociator për fazën finale me Serbinë. Megjithatë partitë opozitare nuk po japin emra se kush duhet ta drejtojë këtë proces, shkruan sot gazeta “Zeri”.

Ndonëse partitë opozitare vazhdimisht deklarohen se nuk e duan presidentin Hashim Thaçi si kryenegociator në dialogun Kosovë – Serbi, ato nuk po pranojnë të propozojnë emër tjetër për kryenegociator. Presidenti Hashim Thaçi, duke komentuar kundërshtimin që po vjen nga opozita, me ironi ka thënë se është në gjendje që detyrën e kryenegociatorit t’ia dorëzojë shefit të Grupit Parlamentar të Lidhjes Demokratike Avdullah Hotit.

Në anën tjetër, zyrtarët e kësaj partie nuk kanë dashur të tregojnë nëse LDK-ja do të pranonte ta drejtonte delegacionin kosovar.

Ndërkaq deputetët e Lëvizjes Vetëvendosje kanë thënë për gazetën “Zëri” se Kuvendi duhet të vendosë për kryenegociatorin, por nuk kanë dashur të flasin se kush do të ishte njeriu i duhur për detyrën e kryenegociatorit. Ndërsa nga Partia Socialdemokrate kanë thënë për “Zërin” që i qëndrojnë mbrapa kërkesës së tyre për seancë të jashtëzakonshme.

Hoti: Qytetarët të vendosin se kush duhet ta drejtojë dialogun

Avdullah Hoti, shef i Grupit Parlamentar të Lidhjes Demokratike të Kosovës, duke mos dashur të komentojë se a do ta pranonte një detyrë të tillë, për gazetën “Zëri” ka thënë se presidenti Thaçi me deklarime të tilla është duke shkelur Kushtetutën e Kosovës.